కువైట్: భారతీయ సంస్కృతి, కువైట్ సంప్రదాయాలను మేళవిస్తూ కువైట్‌లోని భారత రాయబార కార్యాలయం ప్రత్యేకంగా ‘దీపావళి దివానియా’ వేడుకలను నిర్వహించింది. నవంబర్ 2, 3 తేదీల్లో ఇండియా హౌస్‌లో రెండు రోజుల పాటు జరిగిన ఈ కార్యక్రమాలు విశేషంగా ఆకట్టుకున్నాయి. భారత్‌-కువైట్ మధ్య దౌత్య సంబంధాలు ఏర్పడి 65 ఏళ్లు పూర్తయిన సందర్భంగా ఈ వేడుకలను నిర్వహించారు.

భారతదేశపు దీపాల పండుగ దీపావళిని, కువైట్ సంప్రదాయ సమావేశ వేదిక అయిన దివానియాను కలిపి ఈ కార్యక్రమాన్ని రూపొందించారు. ఈ రెండు సంప్రదాయాలు 2025లో యునెస్కో వారసత్వ జాబితాలో చోటు సంపాదించడం ఈ వేడుకలకు మరింత ప్రత్యేకతను తీసుకొచ్చింది. 

నవంబర్ 2న జరిగిన తొలిరోజు వేడుకలకు కువైట్‌లో భారత రాయబారి పరమితా త్రిపాఠి, ఆమె భర్త డాక్టర్ ప్రద్యుమ్న త్రిపాఠి ఆతిథ్యం ఇచ్చారు. ఈ కార్యక్రమానికి కువైట్ ప్రముఖులు, వివిధ దేశాల దౌత్యవేత్తలు, భారతీయ ప్రవాసులు, మీడియా, వ్యాపార రంగ ప్రతినిధులు, భారత్‌కు చెందిన మిత్రులు హాజరయ్యారు. ఈ సందర్భంగా నిర్వహించిన ప్రత్యక్ష వాయిద్య సంగీత ప్రదర్శనలు భారతీయ సంగీత వైభవాన్ని చాటిచెప్పాయి.

నవంబర్ 3న మహిళల కోసం ప్రత్యేకంగా దీపావళి దివానియా కార్యక్రమాన్ని నిర్వహించారు. రాయబారి పరమితా త్రిపాఠి ఆతిథ్యమిచ్చిన ఈ వేడుకల్లో స్థానిక భారతీయ కళాకారులు ప్రదర్శించిన కథక్ ఫ్యూజన్ నృత్యాలు ప్రత్యేక ఆకర్షణగా నిలిచాయి. భారతీయ వస్త్ర సంప్రదాయాలను ఆధునిక డిజైన్లతో మేళవిస్తూ, కువైట్ ఫ్యాషన్ శైలుల స్ఫూర్తితో రూపొందించిన ప్రత్యేక ఫ్యాషన్ ప్రదర్శన కూడా నిర్వహించారు.

అతిథులకు భారతీయ సంప్రదాయ మెహందీ కళ, చీరలు కట్టుకునే విధానాలను పరిచయం చేశారు. భారతదేశంలోని విభిన్న వస్త్ర సంప్రదాయాలు, కళలు, సంస్కృతిని వివరించేలా కార్యక్రమాలను రూపొందించారు.

రెండు రోజుల వేడుకల్లో భారతీయ వంటకాలు, ప్రాంతీయ ప్రత్యేకతలు, కళలు, హస్తకళలు, పర్యాటక రంగ విశేషాలను ప్రదర్శించారు. సంప్రదాయ దీపాలంకరణలు, పండుగ అలంకరణలు, దివానియా తరహా వేదిక అతిథులకు ఆహ్లాదకరమైన వాతావరణాన్ని అందించాయి.

భారత ప్రభుత్వ ‘వన్ డిస్ట్రిక్ట్ వన్ ప్రొడక్ట్’ (ODOP) కార్యక్రమంలో భాగంగా ప్రత్యేక హస్తకళల ప్రదర్శనను కూడా ఏర్పాటు చేశారు. ఇందులో బ్లూ పాటరీ కళాఖండాలు, అలంకరణ దీపాలు, సున్నితమైన ఫిలిగ్రీ పనితనం, చిత్రకళా రూపాలు సందర్శకులను ఆకట్టుకున్నాయి.