దుబాయ్: యూఏఈ ఉపాధ్యక్షుడు, ప్రధానమంత్రి, దుబాయ్ రూలర్ షేక్ మహమ్మద్ బిన్ రషీద్ అల్ మక్తూమ్ దీపావళి పండుగను జరుపుకుంటున్న యూఏఈ నివాసితులతో పాటు ప్రపంచవ్యాప్తంగా ఉన్న ప్రజలకు హృదయపూర్వక శుభాకాంక్షలు తెలిపారు.

ఈ సందర్భంగా ఆయన ప్రత్యేక సందేశాన్ని విడుదల చేశారు. దీపావళి వెలుగుల పండుగ ప్రతి ఒక్కరి జీవితాల్లో శాంతి, ఆశ, సంతోషం, శ్రేయస్సును తీసుకురావాలని ఆకాంక్షించారు. ప్రజలందరూ సురక్షితంగా, సంతోషంగా ఉండాలని, వారి జీవితాలు సుఖసంతోషాలతో వర్ధిల్లాలని కోరుకున్నారు.

యూఏఈలో ఘనంగా దీపావళి వేడుకలు

యూఏఈలో నివసిస్తున్న భారతీయ కుటుంబాలు దీపావళి పండుగను భక్తిశ్రద్ధలతో, ఉత్సాహంగా జరుపుకుంటున్నాయి. ఆలయాల్లో ప్రత్యేక పూజలు, కుటుంబ సమ్మేళనాలు, సాంస్కృతిక కార్యక్రమాలతో పండుగ వాతావరణం నెలకొంది. శుక్రవారం ధన త్రయోదశి (ధంతేరస్)తో ప్రారంభమైన వేడుకలు శని, ఆదివారాల్లో కూడా కొనసాగనున్నాయి. ధంతేరస్ సందర్భంగా పలువురు బంగారం, వెండి, కొత్త వస్తువుల కొనుగోళ్లకు ప్రాధాన్యత ఇచ్చారు.

మరోవైపు, దీపావళి వేడుకల నేపథ్యంలో దుబాయ్‌లోని పలు అపార్ట్‌మెంట్ భవనాల యాజమాన్యాలు అగ్నిప్రమాదాల నివారణకు ప్రత్యేక సూచనలు జారీ చేశాయి. బాల్కనీలు, కారిడార్లు, ఉమ్మడి ప్రదేశాల్లో కొవ్వొత్తులు వెలిగించడం, అగరబత్తులు కాల్చడం, బాణసంచా కాల్చడం నిషేధించినట్లు నివాసితులకు తెలియజేశాయి. పండుగను జరుపుకునే సమయంలో అగ్నిప్రమాదాల పట్ల అప్రమత్తంగా ఉండాలని సూచించాయి.

గ్లోబల్ విలేజ్‌లో ఐదు రోజుల పాటు దీపావళి సంబరాలు

దుబాయ్‌లోని ప్రముఖ పర్యాటక కేంద్రం గ్లోబల్ విలేజ్‌లో నవంబర్ 6 నుంచి 10 వరకు ఐదు రోజుల పాటు ప్రత్యేక దీపావళి వేడుకలు నిర్వహిస్తున్నారు. సాంస్కృతిక ప్రదర్శనలు, పండుగ షాపింగ్, కుటుంబ వినోద కార్యక్రమాలు సందర్శకులను ఆకట్టుకుంటున్నాయి.

ఈ వేడుకల్లో భాగంగా నవంబర్ 8న రాత్రి 8 గంటలకు 600 డ్రోన్లతో ప్రత్యేక ప్రదర్శన నిర్వహించనున్నారు. స్టంట్ అరేనా, సిరియా పెవిలియన్ ప్రాంతాలపై దీపావళి పండుగను ప్రతిబింబించే ఆకర్షణీయమైన ఆకృతులను డ్రోన్ల ద్వారా ప్రదర్శించనున్నారు.

అలాగే, గ్లోబల్ విలేజ్‌లో తొలిసారిగా సంప్రదాయ దక్షిణాసియా సంగీత కార్యక్రమం 'బైఠక్'ను నిర్వహించారు. నవంబర్ 6న రాత్రి 8 నుంచి 9 గంటల వరకు మెయిన్ స్టేజ్‌పై జరిగిన ఈ కార్యక్రమంలో సందర్శకులు కళాకారులతో కలిసి పాటలు పాడుతూ, సంగీతాన్ని ఆస్వాదించారు.

దీపావళి సందర్భంగా యూఏఈలోని భారతీయ సమాజంలో పండుగ సందడి నెలకొనగా, వివిధ దేశాలకు చెందిన ప్రజలు కూడా ఈ వేడుకల్లో భాగస్వాములవుతున్నారు.