రియాద్: సౌదీ అరేబియాలో ప్రైవేట్ రంగంలోని 94 సాంకేతిక ఇంజినీరింగ్ వృత్తులకు సంబంధించి సౌదీకరణ (Saudization) నిబంధనలను ప్రభుత్వం మరింత కఠినతరం చేసింది. ప్రస్తుతం ఉన్న 30 శాతం సౌదీకరణ రేటును 35 శాతానికి పెంచుతున్నట్లు మానవ వనరులు, సామాజిక అభివృద్ధి మంత్రిత్వ శాఖ ఆదివారం ప్రకటించింది. ఈ కొత్త నిబంధనలు 2027 మే 9 నుంచి అమల్లోకి రానున్నాయి. మున్సిపాలిటీలు, గృహ నిర్మాణ మంత్రిత్వ శాఖతో కలిసి ఈ నిర్ణయం తీసుకున్నట్లు అధికారులు వెల్లడించారు. 

సౌదీ పౌరులకు ప్రత్యేక నైపుణ్యాలు అవసరమైన ఉద్యోగాల్లో మరిన్ని అవకాశాలు కల్పించడం, ప్రైవేట్ రంగంలో వారి భాగస్వామ్యాన్ని పెంచడం ఈ నిర్ణయం ప్రధాన ఉద్దేశం. కొత్త నిబంధనల ప్రకారం లక్ష్యంగా నిర్దేశించిన 94 సాంకేతిక ఇంజినీరింగ్ ఉద్యోగాల్లో ఐదుగురు లేదా అంతకంటే ఎక్కువ మంది ఉద్యోగులను నియమించుకున్న ప్రైవేట్ సంస్థలు తప్పనిసరిగా 35 శాతం సౌదీకరణ రేటును పాటించాలి. ఈ శాతాన్ని సంస్థ స్థాయిలో లెక్కిస్తారు. ఇందుకు సంబంధించిన విధివిధానాలను ప్రత్యేక మార్గదర్శకాల్లో వివరించారు. ఇంతకుముందు 2025 జూలై 27 నుంచి ఇదే ఉద్యోగాలకు 30 శాతం సౌదీకరణ నిబంధన అమల్లో ఉంది. తాజాగా దానిని మరో 5 శాతం పెంచారు.

ఏయే ఉద్యోగాలకు వర్తిస్తుంది?

ఈ నిర్ణయం పరిధిలో సివిల్ ఇంజినీరింగ్ టెక్నీషియన్, ఎలక్ట్రికల్ ఇంజినీరింగ్ టెక్నీషియన్, మెకానికల్ ఇంజినీరింగ్ టెక్నీషియన్, ఎలక్ట్రానిక్ ఇంజినీరింగ్ టెక్నీషియన్, సర్వేయింగ్ టెక్నీషియన్, మెకానికల్ మెయింటెనెన్స్ టెక్నీషియన్, ఆర్కిటెక్చరల్ డ్రాఫ్ట్స్‌మన్ తదితర 94 సాంకేతిక, ఇంజినీరింగ్ వృత్తులు ఉన్నాయి. సౌదీ ప్రామాణిక వృత్తుల వర్గీకరణ ప్రకారం ఈ ఉద్యోగాలను గుర్తించారు.

ప్రైవేట్ సంస్థలకు ప్రభుత్వ సహకారం

కొత్త నిబంధనలను అమలు చేసే ప్రైవేట్ సంస్థలకు ప్రభుత్వం పలు ప్రోత్సాహకాలు, సహాయక కార్యక్రమాలను అందించనుంది. ఉద్యోగుల నియామకం, శిక్షణ, అర్హతల పెంపు, ఉపాధి కల్పన, ఉద్యోగ భద్రత వంటి అంశాల్లో సహకారం అందిస్తారు. అలాగే మంత్రిత్వ శాఖ అందించే సౌదీకరణ ప్రోత్సాహక పథకాలకు ప్రాధాన్యత కల్పించనున్నారు. ఈ నిర్ణయానికి సంబంధించిన ప్రత్యేక మార్గదర్శకాలను మంత్రిత్వ శాఖ తన వెబ్‌సైట్‌లో అందుబాటులో ఉంచింది. ఇందులో వర్తించే ఉద్యోగాలు, అమలు విధానం, సౌదీకరణ శాతం లెక్కించే పద్ధతి, సంస్థలు పాటించాల్సిన నిబంధనలను వివరించారు.

సౌదీ విజన్ 2030 లక్ష్యాలకు అనుగుణంగా స్థానిక యువతకు నైపుణ్య ఆధారిత ఉద్యోగ అవకాశాలను పెంచడం, జాతీయ నైపుణ్యాలను బలోపేతం చేయడం, కార్మిక మార్కెట్ సామర్థ్యాన్ని మెరుగుపరచడంలో భాగంగా ఈ నిర్ణయం తీసుకున్నట్లు మంత్రిత్వ శాఖ వెల్లడించింది.