మనామా: సౌదీ అరేబియా భద్రత, సార్వభౌమత్వం బహ్రెయిన్‌తో పాటు గల్ఫ్ సహకార మండలి (జీసీసీ) దేశాల భద్రతలో అంతర్భాగమని బహ్రెయిన్ రాజు హమద్ బిన్ ఈసా అల్ ఖలీఫా స్పష్టం చేశారు. సౌదీ అరేబియాకు బహ్రెయిన్ సంపూర్ణ సంఘీభావం ప్రకటిస్తున్నట్లు తెలిపారు. జీసీసీ సుప్రీం కౌన్సిల్ ప్రస్తుత సమావేశానికి అధ్యక్షత వహిస్తున్న కింగ్ హమద్.. 43వ జీసీసీ అంతర్గత వ్యవహారాల మంత్రుల సమావేశం సందర్భంగా సభ్య దేశాల మంత్రులు, జీసీసీ సెక్రటరీ జనరల్‌తో సమావేశమయ్యారు.

ఈ సందర్భంగా సౌదీ అరేబియా సార్వభౌమత్వం, భద్రత, స్థిరత్వాన్ని కాపాడేందుకు ఆ దేశం తీసుకుంటున్న అన్ని చర్యలకు బహ్రెయిన్ మద్దతు ఇస్తుందని ప్రకటించారు. సౌదీ పౌరులు, నివాసితుల రక్షణకు, ఆత్మరక్షణ హక్కుకు తమ సంపూర్ణ మద్దతు ఉంటుందని స్పష్టం చేశారు. సౌదీ అరేబియాపై హౌతీ మిలీషియా కొనసాగిస్తున్న దాడులను తీవ్రంగా ఖండించారు. ఇవి ఆ దేశ సార్వభౌమత్వాన్ని ఉల్లంఘించడమేనని పేర్కొన్నారు.

ఇరాన్ దాడులను ఎదుర్కోవడంలో జీసీసీ దేశాలు ప్రదర్శిస్తున్న ఐక్యతను కింగ్ హమద్ ప్రశంసించారు. సభ్య దేశాల భద్రత, స్థిరత్వం, సార్వభౌమత్వానికి ఎలాంటి ముప్పు ఎదురైనా కలిసికట్టుగా ఎదుర్కొంటామని స్పష్టం చేశారు. ప్రాంతీయ, అంతర్జాతీయ స్థాయిలో శాంతి స్థాపనకు జీసీసీ చేస్తున్న కృషిని కొనియాడారు. గల్ఫ్ ప్రాంతంలో మారుతున్న పరిణామాల నేపథ్యంలో సభ్య దేశాల మధ్య సమన్వయం, భద్రతా సహకారాన్ని మరింత బలోపేతం చేయాల్సిన అవసరం ఉందని ఆయన అన్నారు. ఈ సమావేశంలో తాజా ప్రాంతీయ పరిణామాలపైనా చర్చించారు.