ఫుజైరా: యూఏఈలోని ఫుజైరా సరిహద్దు ప్రాంతంలో గురువారం తెల్లవారుజామున జరిగిన ఘోర రోడ్డు ప్రమాదాల్లో మరణించిన వారికి శుక్రవారం ప్రత్యేక ప్రార్థనల అనంతరం అంత్యక్రియలు నిర్వహించారు. ఈ ప్రమాదాల్లో మొత్తం 14 మంది ప్రాణాలు కోల్పోగా, మరో 30 మంది గాయపడ్డారు.

యూఏఈలో స్వచ్ఛంద సేవా కార్యక్రమాలు, సామాజిక ప్రకటనలు నిర్వహించే 'జనాజా యూఏఈ' సంస్థ శుక్రవారం దేశవ్యాప్తంగా వివిధ ప్రాంతాల్లో నిర్వహించిన అంత్యక్రియల ప్రార్థనల వివరాలను సోషల్ మీడియా ద్వారా వెల్లడించింది. ఈ ఘటనను హృదయవిదారక విషాదంగా పేర్కొంటూ మృతుల కుటుంబాలకు ప్రగాఢ సానుభూతి తెలియజేసింది.

తల్లి, ఇద్దరు కుమార్తెలకు అంత్యక్రియలు

ఖోర్ ఫక్కన్‌లోని ఒమర్ బిన్ అల్ ఖత్తాబ్ మసీదులో శుక్రవారం ప్రార్థనల అనంతరం తల్లి, ఆమె ఇద్దరు కుమార్తెలకు జనాజా ప్రార్థనలు నిర్వహించారు. అనంతరం అల్ ఘర్బ్ స్మశానవాటికలో ఖననం చేశారు. మృతులను మరియం అబ్దుల్ రహ్మాన్ అల్ హమ్మాది (తల్లి), అహ్లామ్ సైఫ్ అల్ నుఖ్బీ, అమీనా సైఫ్ అల్ నుఖ్బీ (కుమార్తెలు)గా గుర్తించారు.

ఇద్దరు యువ స్నేహితులకు అంతిమ ప్రార్థనలు

షార్జాలోని అల్ హుదా మసీదులో ఇద్దరు యువకులకు అంత్యక్రియల ప్రార్థనలు నిర్వహించారు. ఖల్ఫాన్ సయీద్ మహమ్మద్ అల్ మజ్రూయి, మహమ్మద్ రషీద్ అలీ అల్ కిండీ మృతదేహాలను అల్ సోర్ స్మశానవాటికలో ఖననం చేసేందుకు ఏర్పాట్లు చేశారు.

కుటుంబ సభ్యులకు ఒకేచోట అంత్యక్రియలు

ఫుజైరాలోని షేక్ మహమ్మద్ బిన్ హమద్ అల్ షర్కీ మసీదులో మరో మహిళ, ఆమె సోదరుడు, కుమారుడికి శుక్రవారం ప్రార్థనల అనంతరం జనాజా ప్రార్థనలు నిర్వహించారు. మృతులను మైస్నా జుబైన్ తోబిలికాట్, మహమ్మద్ ఇస్మాయిల్ తోబిలికాట్, మహమ్మద్ ఫయేజ్ నలకత్‌గా గుర్తించారు.

దంపతులకు అంతిమ వీడ్కోలు

ఫుజైరాలోని అల్ ఖరియా ప్రాంతంలో మార్టీర్ సయీద్ అల్ కాబీ మసీదులో అబ్దుల్లా హమద్ మహమ్మద్ అల్ హఫీతి, ఆయన భార్య సుహైర్ సయీద్ అహ్మద్ అల్ యమాహి దంపతులకు అంత్యక్రియల ప్రార్థనలు నిర్వహించారు. అనంతరం అల్ ఖరియా స్మశానవాటికలో ఖననం చేశారు.

15 మంది క్షతగాత్రులు ఆసుపత్రుల నుంచి డిశ్చార్జ్

ఈ ప్రమాదాల్లో గాయపడిన 30 మందిలో 15 మంది అవసరమైన వైద్య చికిత్స పొందిన అనంతరం ఆసుపత్రుల నుంచి డిశ్చార్జ్ అయినట్లు అధికారులు వెల్లడించారు. మిగిలిన వారికి వారి ఆరోగ్య పరిస్థితులను బట్టి ఆసుపత్రుల్లో చికిత్స కొనసాగుతోంది. గాయపడిన వారిలో యూఏఈ, ఒమన్, భారత్, బ్రెజిల్, పాకిస్థాన్, జోర్డాన్, ఈజిప్ట్ దేశాలకు చెందిన పౌరులు ఉన్నారు.

మరోవైపు, మృతుల్లో యూఏఈ పౌరులు కూడా ఉన్నట్లు ఫుజైరా పోలీసులు తెలిపారు. మృతుల గుర్తింపు, మరణాలకు గల కారణాలను నిర్ధారించేందుకు పబ్లిక్ ప్రాసిక్యూషన్ ఫోరెన్సిక్ పరీక్షలు, డీఎన్ఏ పరీక్షలు నిర్వహించాలని ఆదేశించింది. బాధిత కుటుంబాల నుంచి సేకరించిన నమూనాలతో డీఎన్ఏ సరిపోల్చే ప్రక్రియ చేపట్టారు.

ప్రమాదానికి కారణాలు

ప్రాథమిక విచారణ ప్రకారం, మొదటి ప్రమాదంలో ఓ వాహనం రోడ్డు పై నిలిపి ఉంచిన ట్రక్కును ఢీకొట్టింది. రెండో ప్రమాదంలో రెండు కంటైనర్లతో వెళ్తున్న ట్రక్కు పలు వాహనాలను ఢీకొట్టి బోల్తా పడింది. ఆ ప్రాంతంలో రోడ్డు మరమ్మతుల కారణంగా కుడివైపు లేన్ మూసివేసి ఉండటంతో ఈ ఘటన చోటుచేసుకున్నట్లు అధికారులు వెల్లడించారు.

మృతుల కుటుంబాలకు అధికారులు ప్రగాఢ సానుభూతి తెలియజేశారు. గాయపడిన వారు త్వరగా కోలుకోవాలని ఆకాంక్షించారు.