రాయ్‌గఢ్‌ జిల్లాలోని ఉరాన్‌ సైనిక స్థావరం వద్ద అనుమానితుల సంచారంపై ముంబయి పోలీసులు దర్యాప్తు ముమ్మరం చేశారు. తీర ప్రాంతంలో రెండో రోజు తనిఖీలు కొనసాగిస్తున్నారు. విద్యార్థులు అందించిన సమాచారం మేరకు.. ఓ అనుమానితుడి వూహాచిత్రాన్ని పోలీసులు విడుదల చేశారు.
ముంబయిలో గురువారం అనుమానితుల సంచారం కలకలం రేపిన విషయం తెలిసిందే. ఉరాన్‌ సైనిక స్థావరం సమీపంలో పఠాన్‌ సూట్లు వేసుకున్న ఐదుగురు వ్యక్తులు, సాధారణ దుస్తుల్లో ఉన్న మరో వ్యక్తి ఆయుధాలతో తిరుగుతున్నారని కొందరు పాఠశాల విద్యార్థులు స్కూల్‌ యాజమాన్యానికి చెప్పారు.

దీంతో వారు పోలీసులకు సమాచారమందించారు. దీంతో ముంబయి తీరం, పరిసర ప్రాంతాల్లో హై అలర్ట్‌ ప్రకటించారు. రంగంలోకి దిగిన ఏటీఎస్‌, రాష్ట్ర పోలీసులు ముమ్మర తనిఖీలు చేపట్టారు.
ఉరీ ఉగ్రదాడి తరువాత దేశంలోని పలు సైనిక స్థావరాలపై ఉగ్రవాదులు దాడులు చేయొచ్చని నిఘా వర్గాలు హెచ్చరికల జారీచేశాయి. ఈ నేపథ్యంలో అనుమానితుల సంచారంపై సమాచారం రావడంతో నౌకాదళం అప్రమత్తమైంది.