ఇథియోపియాలోని ఒరోమియా ప్రాంతంలో ఏటా జరుపుకొనే పండుగలో తొక్కిసలాట జరిగింది. మతపరమైన పండుగలో కొందరు ప్రభుత్వ వ్యతిరేక నిరసనకారులు నినాదాలు చేయడంతో పోలీసులు వారిని అదుపు చేసేందుకు భాష్పవాయువును ప్రయోగించారు. దీంతో ఒక్కసారిగా భయాందోళనలకు లోనైన ప్రజలు పరుగులు పెట్టడంతో తొక్కిసలాట జరిగింది. ఈ ప్రమాదంలో పలువురు మృతి చెందారు. ఎంతమంది మృతి చెందారనే విషయాన్ని అధికారులు వెల్లడించకపోయినా అక్కడి ప్రతిపక్ష పార్టీలు మాత్రం 50 మంది వరకు మృతి చెందారని ప్రకటిస్తున్నారు. ఇథియోపియా రాజధాని అడిస్‌ అబాబా ప్రాంతానికి 45 కిమీ దూరంలో ఉన్న బిషోఫ్తులో ఇర్రెక ఫెస్టివల్‌ ఆఫ్‌ థ్యాంక్స్‌గివింగ్‌ను ఏటా నిర్వహిస్తారు. చిన్నా, పెద్దా అని తేడా లేకుండా వేలాది మంది ప్రజలు ఇందులో పాల్గొంటారు. స్వేచ్ఛ, న్యాయం కావాలంటూ ప్రజలందరూ నినాదాలు చేస్తారు.