అబుదాబీ: అబుదాబీలోని ఇండియన్‌ ఎంబసీ, ఇండియన్‌ పాస్‌పోర్ట్‌ మరియు వీసా అప్లికేషన్లను ప్రాసెస్‌ చేసేందుకుగాను కొత్త ఏజెన్సీ కోసం ప్రారంభించిన బిడ్డింగ్‌ ప్రాసెస్‌ని రద్దు చేసింది. ఈ మేరకు సీనియర్‌ డిప్లమాట్‌ స్పష్టతనిచ్చారు. కొన్ని సాంకేతిక సమస్యలతో టెండర్‌ ప్రక్రియను రద్దు చేసినట్లు అబుదాబీ ఇండియన్‌ ఎంబసీ ప్రతినిథి నీతా భూషన్‌ చెప్పారు. ఈ సేవల్ని మూడేళ్ళపాటు అందించిన బిఎల్‌ఎస్‌ ఇంటర్నేషనల్‌ సంస్థ టెర్మ్‌ గత ఏడాదితో ముగిసిందనీ, అయినప్పటికీ ఆగస్ట్‌ 2016 వరకూ పొడిగించామనీ భూషన్‌ వివరించారు. అలాగే తాజా పరిణామాల నేపథ్యంలో మరోమారు బిఎల్‌ఎస్‌ టెర్మ్‌ని 2017 జనవరి వరకూ పొడిగించినట్లు తెలిపారు. త్వరలోనే కొత్త బిడ్డింగ్‌ ప్రాసెస్‌ని ప్రారంభిస్తామని ఆమె చెప్పారు. ఈ మార్పుల కారణంగా పాస్‌పోర్ట్‌ సేవలకు ఎలాంటి ఇబ్బందీ ఉండదనీ, కొన్నిసార్లు తలెత్తుతున్న ఇబ్బందులు సాంకేతిక పరమైనవి మాత్రమేననీ, వాటిల్లో లీగల్‌ సమస్యలు ముఖ్యమైనవని ఆమె స్పష్టం చేశారు.