ఉత్తర బాగ్దాద్‌లోని తిక్రిత్ సిటీ సెక్యూరిటీ చెక్‌పాయింట్‌ వద్ద ఆదివారం ఉదయం ఆత్మాహుతి దాడి జరిగింది. ఈ దాడిలో 9 మంది దుర్మరణం పాలయ్యారు. మరో 25 మంది గాయపడ్డారు. మృతులలో ఐదుగురు విద్యార్థినులు, ఒక మహిళ, ముగ్గురు పోలీసులు ఉన్నారు. చెక్‌పాయింట్ వద్ద రద్దీగా ఉన్న సమయంలో ఆత్మాహుతి బాంబర్ పేలుడు పదార్ధాలు నింపిన కారుతో చెక్‌పాయింట్‌ మీదుగా దూసుకుపోయి తనను తాను పేల్చేసుకున్నట్టు సలాహుద్దీన్ ప్రావిన్స్ ప్రతినిధి అలి అల్ హందాని తెలిపారు. కాగా, ఈ దాడికి తామే బాధ్యులమని ఇంతవరకూ ఏ ఉగ్రవాద సంస్థా ప్రకటించలేదు. అయితే గతంలో ఇదే తరహా దాడులకు పాల్పడిన ఐఎస్ ఉగ్రవాదులే ఈ ఘాతుకానికి ఒడిగట్టినట్టుగా అనుమానిస్తున్నారు.సున్నీ ఉగ్రవాదులు బహిరంగ ప్రదేశాల్లో పౌరులు, ఇరాక్ సెక్యూరిటీ దళాలను లక్ష్యం చేసుకుని దాడులు జరపడం పరిపాటి. బాగ్దాద్‌కు 130 కిలోమీటర్ల దూరంలోని తిక్రిత్ నుంచి ఐఎస్ మిలిటెంట్లను 2015 ఏప్రిల్‌లో ఇరాక్ దళాలు తరిమికొట్టాయి