విమానంలో బాంబు ఉందని హెచ్చరించిన భారతీయుడికి రూ.34 లక్షలు జరిమానా వడ్డించడంతో పాటు ఆరు నెలలు జైలు శిక్ష విధించారు. జెనీవా పోలీసు చీఫ్ ఫ్రాంకోయీస్ వారిడెల్ మాట్లాడుతూ గత నెలలో స్విట్జర్లాండ్‌లోని మాంట్రిక్స్‌లో ఉంటున్న వ్యక్తి జెనీవా విమానాశ్రయంలో విమానం బయల్దేరే సమయానికి చేరుకోలేకపోవడంతో ఆ విమానంలో బాంబు ఉందని హెచ్చరించాడని తెలిపారు. దీంతో ఆ విమానంలో తనిఖీలు నిర్వహించేందుకు 101 మంది పోలీసు అధికారులు, ఆరుగురు పబ్లిక్ సెక్యూరిటీ ఏజెంట్లు శ్రమించారని పేర్కొన్నారు. 116 మంది ప్రయాణికులు విమానం నుంచి దిగిపోవాల్సి వచ్చిందన్నారు. విమానం చాలా ఆలస్యంగా బయల్దేరిందని పేర్కొన్నారు.నిందితుడు భారతదేశం వెళ్ళడానికి వీలుగా జెనీవా విమానాశ్రయంలో విమానం ఆలస్యమవ్వాలన్న లక్ష్యంతో ఈ ఉత్తుత్తి హెచ్చరిక చేశాడన్నారు.