శాండిల్‌వుడ్‌లో స్టంట్‌ మాస్టర్ల మృతితో ఇండస్ట్రీ విషాదంలో మునిగిపోయింది. రిజర్వాయర్‌ నుంచి రెండో మృతదేహాన్ని బయటకు తీశారు. మరోవైపు ఈ ఘటనపై క్రిమినల్‌ కేసు నమోదుకాగా... కర్ణాటక ప్రభుత్వం కూడా విచారణకు ఆదేశించింది. ఇటు ఫిల్మ్‌ చాంబర్‌ కూడా ఈ ప్రమాదంపై స్పందించింది. నిర్లక్ష్యంగా వ్యవహరించినవారిపై చర్యలు తప్పవని ప్రకటించింది. 
షూటింగ్‌ సమయంలో ప్రాణాలు కోల్పోయిన స్టంట్‌ మాస్టర్ల మృతితో శాండిల్‌వుడ్‌లో విషాదం నెలకొంది. అనుకోని ప్రమాదంతో ఇద్దరు చనిపోవడంతో ఇండస్ట్రీ మొత్తం శోకసంద్రంలో మునిగింది. 
రిజర్వాయర్‌లో కనిపించకుండా పోయిన అనిల్‌ డెడ్‌బాడీ కూడా దొరికింది. గజ ఈతగాళ్ల సాయంతో బయటకు తీశారు. అతడి మృతదేహాన్ని చూసి కుటుంబ సభ్యులు కన్నీరుమున్నీరయ్యారు. వారి సొంత ఊళ్లలో అనిల్‌, ఉదయ్‌ల అంత్యక్రియలు కూడా పూర్తయ్యాయి. 
ఈ ఘటనను కర్ణాటక ప్రభుత్వం సీరియస్‌గా తీసుకుంది. ముమ్మాటికీ ఈ సంఘటన నిర్లక్ష్యమేనన్న సీఎం సిద్దరామయ్య విచారణకు ఆదేశించారు. ఇటు పోలీసులు కూడా నిర్మాత, డైరెక్టర్‌, స్టంట్‌ మాస్టర్‌పై క్రిమినల్‌ కేసులు నమోదు చేసినట్లు తెలుస్తోంది. అలాగే ఫిల్మ్‌ చాంబర్‌ కూడా ప్రమాదంపై స్పందించింది. నిర్లక్ష్యంతోనే ఇద్దరి ప్రాణాలు పోయాయని... రెండు మూడు రోజుల్లో సమావేశం ఏర్పాటు చేసి దీనికి బాధ్యులైనవారిపై కఠినచర్యలు తీసుకొంటామని ప్రకటించారు.