పెట్టుబడుల ఆకర్షణ లక్ష్యంగా రాష్ట్ర ప్రభుత్వం విదేశాల్లో నిర్వహించే కార్యక్రమాల్లో పాల్గొనేందుకు ముఖ్యమంత్రి చంద్రబాబు సన్నద్ధమవుతున్నారు.అందులో భాగంగా ఈ నెల 29,30 తేదీల్లో ఆయన సింగపూర్ లో ,డిసెంబర్ 2,3 తేదీల్లో దుబాయ్ ,కువైట్ లలో పర్యటించనున్నారు.జనవరి ఆఖర్లో విశాఖపట్నంలో జరిగే సీఐఐ భాగస్వామ్య సదస్సుకు ముందుగా వివిధ దేశాల్లో పర్యటించి పెట్టుబడుల్ని ఆకర్షించాలన్న ప్రణాళికలో భాగంగా చంద్రబాబు ఈ దేశాల్లోని పారిశ్రామికవేత్తలతో సమావేశం కావాలని భావించారు.ఆర్ధిక మంత్రి యనమల రామకృష్ణుడు ఆధ్వర్యంలోని బృందం ఈ నెల  27 నుంచి వచ్చే నెల మూడో తేదీ వరకు ఆస్ట్రేలియా,న్యూజిలాండుల్లో పర్యటించబోతోంది.ఎకనామిక్ డెవలప్మెంట్ బోర్డు(ఈడీబీ) చైర్మన్ కృష్ణ కిషోర్ ఆధ్వర్యంలోని బృందం ఇప్పటికే కొన్ని దేశాల్ని సందర్శించి పారిశ్రామిక సంస్థలతో సంప్రదింపులు జరిపింది.భాగస్వామ్య సదస్సు జరిగేలోగా మరికొన్ని దేశాల్లో పర్యటించబోతోంది.