'బా హుబలి' సినిమా తర్వాత మళ్లీ రమ్యకృష్ణ నటిగా బిజీ అయిపోయింది. పలు భాషల నుంచి ఆమెకి అవకాశాలు వెల్లువెత్తుతున్నాయి. తమిళంలోనైతే కీలకమైన చిత్రాల్లో ఆమె దర్శనమిస్తోంది. తాజాగా సూర్య చిత్రంలోనూ ఆమెకి ఓ ప్రధాన పాత్ర దక్కింది. సూర్య కథానాయకుడిగా విఘ్నేష్‌శివన్‌ దర్శకత్వంలో ఓ చిత్రం తెరకెక్కుతున్న విషయం తెలిసిందే. కథానాయిక నయనతార ప్రియుడైన విఘ్నేష్‌ ఒకప్పుడు సూర్యకి అభిమాని. ఇప్పుడు తన అభిమాన కథానాయకుడితో సినిమా చేసే అవకాశాన్ని సొంతం చేసుకొన్నాడు. ఆ సినిమాలోనే రమ్యకృష్ణకి ఓ కీలక పాత్రని కట్టబెట్టాడు. పెద్దయెత్తున రమ్యకృష్ణ కాల్షీట్లని ఇప్పించుకొన్నారట.దీన్నిబట్టి ఆమె ఎంతటి ప్రధానమైన పాత్ర చేస్తుందో అర్థం చేసుకోవచ్చు. ఆ సినిమాలోని కొన్ని కీలక సన్నివేశాల్ని హైదరాబాద్‌లో తెరకెక్కిస్తారని తెలిసింది.