హీరో సూర్య, అనుష్క, శ్రుతిహాసన్‌ ప్రధాన తారాగణంగా తెరకెక్కిన 'ఎస్‌ 3 (యముడు-3)' చిత్రం విడుదలకు సిద్ధమైంది. హరి దర్శకత్వంలో తెలుగు, తమిళ భాషల్లో ఏకకాలంలో తెరకెక్కిన ఈ చిత్రాన్ని జనవరి 26న ప్రపంచ వ్యాప్తంగా విడుదల చేస్తున్నట్లు చిత్ర బృందం తెలిపింది. ఈ సందర్భంగా నిర్మాత మల్కాపురం శివకుమార్‌ మాట్లాడుతూ.. 'తెలుగు, తమిళ చిత్ర పరిశ్రమలో తన నటనతో ప్రత్యేక అభిమానుల్ని సంపాదించుకున్న సూర్య, హరి కాంబినేషనల్లో రూపొందిన 'యముడు', 'సింగం' చిత్రాలు ఘన విజయం సాధించాయి. వాటికి కొనసాగింపుగా వస్తోన్న చిత్రం 'ఎస్‌3'.

దర్శకుడు చిత్రాన్ని యాక్షన్‌ ఎంటర్‌టైనర్‌గా తెరకెక్కించారు. పరుగులు పెట్టే స్క్రీన్‌ప్లేతో థ్రిల్‌ని కలిగించే సన్నివేశాలతో ఈ చిత్రం సాగుతుంది. ఇప్పటికే విడుదలైన టీజర్లతో సినిమాపై అంచనాలు భారీగా పెరిగాయి. ప్రేక్షకుల అంచనాలకు తగ్గట్టు చిత్రం ఉండబోతోంది.

నీతి నిజాయితీలే వూపిరిగా భావించే ఓ పోలీసు అధికారి వృత్తి నిర్వహణలో తనకు ఎదురైన సవాళ్లను ఎలా ఎదుర్కొన్నాడన్నదే ఈ చిత్ర ఇతివృత్తం' అని తెలిపారు..
హారిస్‌ జయరాజ్‌ ఈ చిత్రానికి స్వరాలు సమకూర్చారు. రాధికా శరత్‌కుమార్‌, నాజర్‌, రాడాన్‌ రవి, సుమిత్ర తదితరులు చిత్రంలో ముఖ్య పాత్రలు పోషించారు.