సౌదీ అరేబియాకి చెందిన బడ్జెట్‌ ఎయిర్‌ లైన్స్‌ ఫ్లైనాస్‌, బహ్రెయిన్‌కి బడ్జెట్‌ విమానాల్ని నడపనుంది. రియాద్‌ మరియు జెడ్డా నుంచి బహ్రెయిన్‌కి తక్కువ ఖర్చుతో విమాన యానాన్ని అందుబాటులోకి తీసుకు రానున్నట్లు ఫ్లైనాస్‌ సంస్థ నిన్న ప్రకటించింది. డిసెంబర్‌ 1 నుంచి ఈ విమాన సర్వీసులు ప్రారంభం కానున్నాయి. టిక్కెట్‌ అమ్మకాలు కూడా ప్రారంభమయ్యాయి. ప్రారంభ ఆఫర్‌గా, టిక్కెట్‌ ధరను 299 సౌదీ రియాల్స్‌ నుంచి (బహ్రెయిన్‌ దినార్స్‌ 30) అందుబాటులోకి తీసుకొస్తున్నారు. జెడ్డా నుంచి బహ్రెయిన్‌కి, రియాద్‌ నుంచి బహ్రెయిన్‌కి వారంలో మూడేసి రోజుల చొప్పున ఫ్లైనాస్‌ బడ్జెట్‌ విమాన సేవల్ని అందించనుంది. బహ్రెయిన్‌కి పెరుగుతున్న విమాన ప్రయాణీకుల నేపథ్యంలో, ఆ రంగంలో తమ వాటాను పొందడానికీ, ప్రయాణీకులకు తక్కువ ఖర్చుతో విమానయానాన్ని అందించడానికీ విమాన సర్వీసులు నడపనున్నట్లు ఫ్లైనాస్‌ ప్రతినిథులు వివరించారు.