ఖతార్‌లో గల్ఫ్‌ దేశాలు సంబంధాలను తెంచుకోవడం పట్ల అమెరికా అధ్యక్షుడు డొనాల్ట్‌ ట్రంప్‌ హర్షం వ్యక్తం చేశారు. ఈ సందర్భంగా సౌదీ రాజు సల్మాన్‌ అమిద్‌కు ట్రంప్‌ వ్యక్తిగతంగా ఫోన్‌ చేసి మాట్లాడారు. ఉగ్రవాదంపై పోరుకు గల్ఫ్‌ దేశాలు ఐక్యమవాలని ఆయన కోరారు. ఉగ్రవాద సంస్థలను ఆర్థికంగా దెబ్బతీయడం తదితర కీలకమైన విషయాల గురించి ఇరు నేతలు చర్చించినట్లు శ్వేతసౌధం వర్గాలు ఓ ప్రకటన ద్వారా వెల్లడించాయి. ఖతార్‌ విషయం తెలిసిన వెంటనే ట్విటర్‌ ద్వారా స్పందించిన ట్రంప్‌ ‘నా పశ్చిమాసియా పర్యటన ఫలించింది. అతివాద భావజాలానికి ఏ రకంగాను ఆర్థిక సాయం చేయకూడదని నా పర్యటనలో చెప్పాను, నేతలు ఖతార్‌ను ఎంచుకున్నారు. ఉగ్రవాద నిర్మూలనకు ఇదే తొలి అడుగు కావచ్చు’ అంటూ ట్వీట్‌ చేసిన విషయం తెలిసిందే.
తీవ్రవాద సంస్థలకు, ఉగ్రవాదులకు అండగా నిలుస్తుందని ఖతార్‌తో సౌదీఅరేబియా, బహ్రెయిన్‌, యునైటెడ్‌ అరబ్‌ ఎమిరేట్స్‌తో పాటు మరికొన్ని దేశాలు సంబంధాలు తెంచుకున్న విషయం తెలిసిందే. అయితే గల్ఫ్‌ దేశాలు చేస్తున్న ఆరోపణలను ఖతార్‌ తీవ్రంగా ఖండిస్తోంది.