మెసేజింగ్‌ సర్వీస్‌ అనగానే ముందుగా గుర్తొచ్చేది వాట్సాప్‌. వియ్‌ చాట్‌, హైక్‌ వంటి ఎన్ని మెసెంజర్లు వచ్చినా వినియోగదారులు ఎక్కువమంది వాట్సాప్‌వైపే మొగ్గుచూపారు. ఇప్పుడు వాట్సాప్‌నకు పోటీగా మరో కొత్త యాప్‌ రాబోతోంది. ప్రముఖ ఈ-కామర్స్‌ దిగ్గజం అమెజాన్‌ ఈ కొత్త యాప్‌ను తీసుకురాబోతోంది. 'ఎనీటైమ్‌' పేరిట దీన్ని వినియోగదారులకు అందుబాటులోకి తేనుంది.అంతకుముందు వ్యాపార వినియోగదారుల కోసం ఇదే సంస్థ గతంలో 'చైమ్‌' అనే యాప్‌ను రూపొందించగా.. తాజాగా అందరి వినియోగదారుల కోసం కొత్త యాప్‌ను తీసుకురాబోతోంది.
వాట్సాప్‌ తరహాలో ఈ యాప్‌లో చాట్‌ చేసుకోవడంతో పాటు, ఆడియో, వీడియో కాల్స్‌ చేసుకునే సదుపాయం ఉండబోతోంది. అంతేకాదు ముఖ్యమైన మెసేజ్‌లను ఎన్‌క్రిప్ట్‌ చేసుకునే వెసులుబాటు కల్పిస్తోంది. అటు మొబైల్‌తో పాటు, డెస్క్‌టాప్‌లోనూ పనిచేసే విధంగా దీన్ని తీర్చిదిద్దుతున్నారు. వాట్సాప్‌ మాదిరిగా వీడియోలను, ఇమోజీలు, స్టిక్కర్లు, జిఫ్‌ ఇమేజ్‌లను సైతం పంపుకోవచ్చు. ఫోన్‌ నంబరుతో సంబంధం లేకుండా పేర్లు ద్వారా స్నేహితులు అనుసంధానం అవ్వొచ్చు.త్వరలో దీన్ని వినియోగదారులకు తీసుకొచ్చేందుకు అమెజాన్‌ సన్నద్ధమవుతోంది.