ఎటుచూసిన చూడ చక్కని అందాలు, చిన్నచిన్న ద్వీపాలతో అలరారే కరీబియన్‌ దీవుల్లోని బహమాస్‌ దేశం హరికేన్‌ ఇర్మా ధాటికి కుదేలైంది. బహమాస్‌లో 700కు పైగా ద్వీపాలు ఉన్నాయి. సముద్ర తీరాన్ని ఆనుకుని ఎన్నో బీచ్‌లు, రిసార్ట్‌లు ఉన్నాయి. అయితే ఇర్మా విధ్వంసం అనంతరం బీచ్‌లు, రిసార్టులకు చేరువలో ఉండే సముద్రం మాయమైంది.

అది ఎంతలా అంటే కనుచూపు మేరలో సముద్రం ఉందని తెలియనంత దూరానికి అట్లాంటిక్‌ సముద్రం వెనక్కు వెళ్లింది. ఓ బహమాస్‌ వాసి ట్విటర్‌లో పోస్టు చేసిన వీడియో షాక్‌కు గురి చేయక మానదు. అయితే, కేవలం 13 గంటల్లో సముద్రం మళ్లీ తిరిగి ఆ ప్రదేశానికి వచ్చేసింది. సముద్రపు నీరు వెనక్కు వెళ్లడానికి ఓ కారణం ఉంది. హరికేన్‌ అత్యధిక ఒత్తిడికి గురి చేసి నీటిని తన వైపునకు లాక్కొవడం వల్లే ఇలా జరిగింది. ఇలాంటి పరిస్థితి సునామీ రాకకు ముందు సంభవిస్తుంటుంది.