ఎన్ని తరాలు మారినా తెలుగు ప్రేక్షకుల హృదయాల్లో స్థిరంగా నిలిచిపోయే నటులు ఎస్వీ రంగారావు. ఆయన నటన, పోషించిన పాత్రలు నిత్యనూతనం. ఆయన సమకాలీన నటి సావిత్రి జీవితం ఆధారంగా 'మహానటి' పేరుతో ఓ చిత్రం తెరకెక్కుతోంది. నాగ్‌ అశ్విన్‌ దర్శకత్వం వహిస్తున్న ఆ చిత్రంలో ఎస్వీ రంగారావు పాత్ర కూడా ఉంటుంది. ఆ పాత్రలో మోహన్‌బాబు నటించబోతున్నారు. ఎస్వీ రంగారావు పాత్ర నిడివి తక్కువే అయినప్పటికీ... అందులో మోహన్‌బాబు చేసే సందడి ప్రేక్షకుల్ని ఆకట్టుకొనేలా ఉంటుందని, అక్టోబరు చివర్లో కానీ, లేదంటే నవంబరు మొదటివారంలో కానీ ఆయన సెట్లోకి అడుగుపెట్టనున్నట్టు చిత్రబృందం వెల్లడించింది. కీర్తి సురేష్‌, సమంత, దుల్కర్‌ సల్మాన్‌, షాలిని పాండే, ప్రకాష్‌రాజ్‌ తదితరులు ప్రధాన పాత్రధారులుగా తెలుగు, తమిళ భాషల్లో ఏకకాలంలో రూపొందుతోందీ చిత్రం. ప్రస్తుతం పాలకొల్లులో కీలక సన్నివేశాల్ని తెరకెక్కిస్తున్నారు. త్వరలోనే ఫస్ట్‌లుక్‌ని విడుదల చేయబోతున్నారు.