భూమికన్నా 10 రెట్ల బరువు ఉండొచ్చని అంచనా వాషింగ్టన్, అక్టోబర్ 16: మన సౌరకుటుంబంలో సూపర్ ఎర్త్ ఉనికి నిజమేనని నాసా శాస్త్రవేత్తలు ప్రకటించారు. ఇది భూమి కన్నా 10 రెట్ల బరువు ఉండొచ్చని, సూర్యుడు-నెప్ట్యూన్ మధ్య దూరం (450 కోట్ల కి.మీ.) కన్నా 10 రెట్ల దూరంలోని (4,500 కోట్ల కి.మీ.) కక్ష్యలో తిరుగుతుండొచ్చని అంచనా వేస్తున్నారు. మన సౌర కుటుంబం అంచుల్లోని చీకటి ప్రదేశంలో భారీ గ్రహం ఉండొచ్చని శాస్త్రవేత్తలు ఎప్పటి నుంచో భావిస్తున్నారు. దీనికి ప్లానెట్-9 అని పేరు పెట్టారు. దశాబ్దాలుగా పరిశోధనలు చేస్తున్నా గ్రహం ఉనికికి సంబంధించి కచ్చితమైన ఆధారాలు లభించలేదు. తాజాగా సూపర్ ఎర్త్‌కు సంబంధించి ఐదు పరిశీలనాత్మక ఆధారాలు లభించాయని అమెరికాలోని కాలిఫోర్నియా ఇన్‌స్టిట్యూట్ ఆఫ్ టెక్నాలజీకి చెందిన అంతరిక్ష పరిశోధకుడు కాంస్టంటిన్ బటైజిన్ తెలిపారు.

గ్రహం బరువు, కక్ష్యకు సంబంధించి ప్రాథమిక ఆధారాలు దొరికాయన్నారు. ఐదు ఆధారాలను విశ్లేషించి చిక్కుముడి విప్పేందుకు ప్రయత్నిస్తున్నామన్నారు. నెప్యూన్ గ్రహం తర్వాత సౌరకుంటుంబం చివరి వరకు ఉన్న ప్రదేశాన్ని క్యూపియర్ బెల్ట్ అంటారు. ఇందులో ఆరు భారీ ఖగోళ వస్తువులు, గ్రహశకలాలు ఉన్నాయని శాస్త్రవేత్తలు గతంలోనే గుర్తించారు.

ఆ ఖగోళ వస్తువుల తర్వాత క్యూపియర్ బెల్ట్ అంచుల్లో సూపర్ ఎర్త్ ఉండొచ్చని అంచనాకు వచ్చారు. ఇది మిగతా గ్రహాలతోపాటే 45 కోట్ల ఏండ్ల కిందటే పుట్టి ఉండొచ్చన్నారు. ప్లానెట్-9ను గుర్తించగలిగితే సౌరకుటుంబానికి సంబంధించిన పలు చిక్కుముడులు వీడుతాయని శాస్త్రవేత్తలు చెప్తున్నారు. ఈ పరిశోధన వ్యాసం ఆస్ట్ట్రనామికల్ జర్నల్‌లో ప్రచురితమైంది.