ఉగ్రవాద సంస్థ హిజ్బుల్‌ ముజాహిదీన్‌ అధినేత సయ్యద్‌ సలావుద్దీన్‌ కుమారుడు సయ్యద్‌ షాహిద్‌ యూసఫ్‌ ఇంట్లో జాతీయ దర్యాప్తు సంస్థ(ఎన్‌ఐఏ) అధికారులు సోదాలు చేపట్టారు. ఉగ్రవాదులకు నిధులు సమకూరుస్తున్నాడన్న ఆరోపణలపై గత మంగళవారం యూసఫ్‌ను అరెస్టు చేసిన విషయం తెలిసిందే. ఈ కేసులో విచారణ చేపట్టిన ఎన్‌ఐఏ అధికారులు నేడు తనిఖీలు చేపట్టారు. బుద్గాం జిల్లాలోని సోయ్‌బుగ్‌ గ్రామంలోని యూసఫ్‌ నివాసంలో ఈ ఉదయం నుంచి సోదాలు చేస్తున్నారు. 
యూసఫ్‌ ప్రస్తుతం జమ్ముకశ్మీర్‌ ప్రభుత్వంలోని వ్యవసాయ విభాగంలో పనిచేస్తున్నాడు. 2011లోని కేసుకు సంబంధించి ఆయనకు సమన్లు అందడంతో గత మంగళవారం అతడు ఎన్‌ఐఏ ఎదుట హాజరయ్యాడు. ఈ సందర్భంగా విచారించిన అధికారులు అతడిని అరెస్టు చేశారు. సయ్యద్‌ సలావుదీన్‌ ఆదేశాల మేరకు 2011-14 మధ్య గులామ్‌ మహ్మద్‌ భట్‌(ఇవే ఆరోపణలపై ప్రస్తుతం జైల్లో ఉన్నాడు).. యూసఫ్‌కు డబ్బులు బదిలీ చేసినట్లు తమ వద్ద సాక్ష్యాలున్నాయని అధికారులు తెలిపారు. ఈ కేసులోతదుపరి విచారణ కోసం యూసఫ్‌ను ఏడు రోజుల కస్టడీకి తరలించారు.