హైదరాబాద్ కి గర్వకారణం, లక్షలాది ప్రజలకి ట్రాఫిక్ సమస్యలని దూరం చేసే మెట్రో ప్రారంభానికి అంతా సిద్ధం అవుతోంది. మెట్రో సేఫ్టీ అథారిటీ నుంచి క్లియరెన్స్ రావడం తో ఈ నెల 28న మెట్రో ని ప్రారంభించేందుకు ఎల్&టి శరవేగంగా పనులు పూర్తి చేస్తోంది. పబ్లిక్ ప్రైవేట్ పార్టనర్ లో నిర్మాణం అయిన మెట్రోలలో మన మెట్రో నే ప్రపంచంలోనే అతి పెద్దది. ఈ ప్రాజెక్ట్ పూర్తి కావడానికి 20 వేల కోట్ల రూపాయలకి పైగానే ఖర్చు కానుంది. ఈ ప్రాజెక్ట్ అంచనా వ్యయం సుమారు 15 వేల కోట్లు కాగా, ప్రాజెక్ట్ ఆలస్యం కావడం తో 20 వేల కోట్లకు చేరనుంది. దీనిలో కేంద్ర ప్రభుత్వం నిధులు సుమారు 1500 కోట్లు. రాష్ట్ర ప్రభుత్వం 269 ఎకరాలు భూమి ఇచ్చింది. ఎల్&టి సంస్థ ఈ ప్రాజెక్ట్ కోసం సుమారు 20 వేల కోట్లు అప్పులు సమీకరించాల్సి ఉంటుంది. దీనిలో సగం 10 వేల కోట్లని L&T సమీకరించి ఖర్చు చేసింది. సుమారు 20 వేల కోట్లతో ఈ ప్రాజెక్ట్ పూర్తయ్యేనాటికి రోజుకి లక్ష మంది మెట్రో లో ప్రయాణించవచ్చు. అంటే ఒక్కో ప్రయణీకుడి మీద ఎంత ఖర్చు అవుతుంది అని లెక్కవేస్తె కళ్ళు తిరిగే సంఖ్య తేలుతోంది. అదెలా అంటే..
మొత్తం ఖర్చు 20వేల కోట్లు 8% వడ్డీకి అప్పు తెస్తే..
నెలకి 146,75,00,000 అంటే 146 కోట్ల రూపాయలు EMI అవుతుంది.
అంటే రోజుకి సుమారు 5 కోట్ల రూపాయలు EMI కింద పక్కన పెట్టాలి.
మొత్తం ఖర్చులో 50% రియల్ ఎస్టేట్ ద్వారా, 45% టిక్కెట్ల ద్వారా, 5% ప్రకటనల ద్వారా తిరిగి రాబట్టుకోవాలి అని L&T అంచనా.
మూడు మార్గాలు పూర్తయ్యేసరికి రోజుకి లక్ష మంది ప్రయాణీకులు మెట్రోని ఉపయోగించుకునే వీలుంది.
లక్ష మంది ప్రయాణీకులనుంచి రోజుకి 5 కోట్లలో సగం డబ్బు 2.5 కోట్లు రాబట్టుకోవాలన్నా, ఒక్కో టికెట్ 250 రూపాయలు ఉండాలి. (నిర్వహణ ఖర్చులు కాకుండా) కానీ ఇప్పుడున్న సమాచారం ప్రకారం గరిష్ట టికెట్ ధర రూ.50 ఉండే వీలుంది. అంటే ఒక్క ప్రయాణీకుడి మీద L&T రూ.200 నష్టాన్ని భరించాలి.
మెట్రో మాల్స్, మెట్రో స్టేషన్లలో ఉండే స్టాల్స్ కి భారీగా రెంట్స్ వస్తే L&T కి పెట్టిన పెట్టుబడి తిరిగి వస్తుంది. ప్రాజెక్ట్ పూర్తయ్యాక జపాన్ బ్యాంకుల నుంచి 2% వడ్డీకి ఋణం తీసుకుని మన దేశ బ్యాంకుల అప్పు తీర్చేస్తే వడ్డీ భారం బాగా తగ్గుతుంది. అప్పుడు మెట్రో లాభదాయకం కావచ్చు. ప్రయాణీకుల సంఖ్య బాగా పెరిగి, రోజుకి కనీసం రెండు లక్షల మంది మెట్రోని ఉపయోగించుకుంటే ఆర్థికంగా వెసులుబాటు ఉంటుంది.