కొంతకాలంగా తాను హైగ్రేడ్‌ క్యాన్సర్‌తో బాధపడుతున్నానని నటి సోనాలి బింద్రే వెల్లడించిన సంగతి తెలిసిందే. ఈ వ్యాధితో ధైర్యంగా పోరాడతానని, త్వరగా కోలుకునేందుకు ప్రయత్నిస్తానని వెల్లడించారు. ప్రస్తుతం ఆమె న్యూయార్క్‌లో చికిత్స పొందుతున్నారు. కీమోథెరపీ నిమిత్తం సోనాలి తన జుట్టును కత్తిరించుకున్నారు. న్యూయార్క్‌లోని ఓ సెలూన్‌లో హెయిర్‌ కట్‌ చేయించుకున్న ఫొటోను ఇన్‌స్టాగ్రామ్‌లో పోస్ట్‌ చేశారు. 'మనలో దాగున్న బలాన్ని బలవంతంగా బయటపెట్టేంత వరకు మనమెంత దృఢంగా ఉన్నామో చెప్పలేం. కొన్ని రోజుల నుంచి నాకు ఎందరో మద్దతు తెలుపుతూ వచ్చారు. క్యాన్సర్‌తో పోరాడిన వారు కూడా తమ అనుభవాలను పంచుకుంటూ నాకు ధైర్యం చెప్పారు. వారందరికీ కృతజ్ఞతలు. మీరు పంచుకున్న విషయాలన్నీ నాలో మరింత ధైర్యాన్ని నింపాయి. పోరాడే శక్తినిచ్చాయి.

ముఖ్యంగా..నేను ఒంటరిగా లేనన్న విషయాన్ని తెలియజేశాయి. ప్రతీ క్షణం పాజిటివిటీతోనే ఉండాలని అనుకుంటున్నాను.' అని తెలిపారు. అయితే సోనాలికి జుట్టు కత్తిరిస్తున్నప్పుడు తీసిన వీడియో సోషల్‌మీడియాలో వైరల్‌ అవుతోంది. అద్దంలో తనని తాను చూసుకుంటూ సోనాలి ఉద్వేగానికి లోనయ్యారు.

ఈ వీడియో చూసిన వారంతా ఆమె త్వరగా కోలుకోవాలని మనస్ఫూర్తిగా కోరుకుంటున్నట్లు కామెంట్లు పెడుతున్నారు.