హైదరాబాద్‌కు మరో చెత్త సంస్కృతి దిగుమతి అవుతోంది. పాతబస్తీలో జూపార్క్ సమీపంలోని ఓ లాడ్జిలో ముజ్రా పార్టీ నిర్వహించారు. అదే పార్టీలో మద్యం సేవించి మత్తులోకి వెళ్లిన ఓ యువతిపై.. ఖుద్దూస్ అనే యువకుడు అత్యాచార యత్నం చేశాడు.

కాలాపత్తర్‌ పోలీస్‌స్టేషన్ పరిధిలో ముజ్రా పార్టీ నిర్వహించడం.. యువతిపై అత్యాచార యత్నం జరగడం తీవ్ర కలకలం రేపుతోంది. పక్కా సమాచారంతో పోలీసులు లాడ్జిపై దాడులు చేశారు. ముగ్గురు యువతులు, ఐదుగురు యువకుల్ని అదుపులోకి తీసుకున్నారు. వారిలో కొందరు మైనర్లు ఉన్నారు.

హైదరాబాద్‌లో ఈమధ్య పెడధోరణులు పెరిగిపోతున్నాయి. పాష్ కల్చర్ పేరుతో నగర శివార్లలోని ఫామ్‌హౌస్‌లలో రేవ్‌ పార్టీలు, సిటీలోని లాడ్జిల్లో ముజ్రా పార్టీలు నిర్వహిస్తున్నారు. ఇప్పుడు ఏకంగా అత్యాచార యత్నానికి పాల్పడడం పరాకాష్టగా భావిస్తున్నారు. మద్యం మత్తులోని మైనర్‌ బాలికను లైంగిక వేధింపులకు గురిచేసిన పాతబస్తీ అనుమానితుడు ఖుద్దూస్‌పై నిర్బయ చట్టం కింద కేసు పెట్టారు. మిగతా వారిపై కోప్టా సెక్షన్ల కింద కేసు నమోదు చేశారు.