వికలాంగులకోసం కేటాయించిన పార్కింగ్‌ స్లాట్స్‌లో సాధారణ మోటరిస్టులు తమ వాహనాలు నిలుపుతూ ఇబ్బందులకు గురిచేస్తున్నట్లు గుర్తించిన రాయల్‌ ఒమన్‌ పోలీసులు, ఇకపై వికలాంగుల పార్కింగ్‌ స్థలాల్లో సాధారణ వ్యక్తులు వాహనాల్ని నిలిపితే కఠిన చర్యలు తీసుకోనున్నట్లు హెచ్చరించారు. నిబంధనల్ని అతిక్రమించినవారికి 10 ఒమన్‌ రియాల్స్‌ ఫైన్‌ విధించనున్నామన్నారు రాయల్‌ ఒమన్‌ పోలీస్‌ అధికారి ఒకరు. నిబంధనల్ని పదే పదే ఉల్లంఘించినవారికి ఇంకా అధిక మొత్తంలో ఫైన్‌ విధించాలని హిమాన్షు మండాలియా అనే ఎక్స్‌పాట్‌ రాయల్‌ ఒమన్‌ పోలీసులకు విజ్ఞప్తి చేశారు. ఓ సర్వేలో 82 శాతం మంది వికలాంగులకు కేటాయించిన పార్కింగ్‌ స్థలాల్లో తాము వాహనాల్ని పార్కింగ్‌ చేయబోమని చెప్పగా, 18 శాతం మంది మాత్రం ఆ నిబంధనను తాము ఉల్లంఘించినట్లు చెప్పారు.