సీనియర్‌ నటుడు రంగనాథ్‌ బలవన్మరణానికి పాల్పడ్డారన్న విషయం తనను షాక్‌కు గురిచేసిందని చిరంజీవి అన్నారు. ఫిలిం ఛాంబర్‌లో ఆయన భౌతికకాయానికి చిరంజీవి నివాళులర్పించారు. అనంతరం రంగనాధ్‌ కుటుంబసభ్యులను పరామర్శించారు. ఆయన మాట్లాడుతూ.. తన కెరీర్‌ తొలి దశ నుంచి రంగనాథ్‌తో మంచి సంబంధాలున్నాయన్నారు. లవ్‌ ఇన్‌ సింగపూర్‌ చిత్రంలో రంగనాథ్‌ కథానాయకుడిగాను, తాను రెండో హీరోగా నటించిన విషయాలను చిరంజీవి గుర్తు చేసుకున్నారు. అప్పటి నుంచి ఆయనతో సత్సంబంధాలు ఉన్నాయన్నారు. ఆయనతో ఎన్నో చిత్రాల్లో కలిసి నటించినట్లు చెప్పారు. రంగనాథ్‌ మరణం సినీ పరిశ్రమకు తీరని లోటని చిరంజీవి అన్నారు.