భారత్‌లో పెట్రోల్‌ రేట్లు బాగా తగ్గే అవకాశాలు కనిపిస్తున్నాయి. ఇరాన్‌పై అమెరికా ఆంక్షల పునరుద్దరణతో భారత దేశానికి ఊరట లభించి అవకాశం ఉంది. ఇరాన్ నుంచి ముడి చమురు కొనేందుకు ఇండియా, సౌత్ కొరియా, జపాన్ సహా 8 దేశాలకు అమెరికా అనుమతిచ్చింది.

వచ్చే వారం నుంచి ఇరాన్‌పై అమెరికా మరోసారి ఆంక్షలు విధించనున్న నేపథ్యంలో ఆ దేశం నుంచి పూర్తిగా ఆయిల్ దిగుమతులను నిలిపేయాలని అన్ని మిత్ర దేశాలను గతంలో అమెరికా ఆదేశించింది. అయితే తమకు ఇరాన్ నుంచి చమురు కొనుగోలు చేసేందుకు అనుమతి ఇవ్వాలంటూ 8 దేశాలు కోరాయి. ఇండియా తోపాటు జపాన్, సౌత్ కొరియా తమ చమురు దిగుమతుల కోసం ఎక్కువగా ఇరాన్‌పైనే ఆధారపడుతున్నాయి. తాజాగా అమెరికా తీసుకున్న నిర్ణయం ఈ దేశాలకు పెద్ద ఊరట కలిగించేదే.

ఇప్పటికీ అమెరికాతో ఇంకా చర్చలు జరుగుతున్నాయని, రెండో రోజుల్లో తుది నిర్ణయం వెలువడుతుందని చైనాకు చెందిన ఓ అధికారి వెల్లడించారు. ఇండియా, సౌత్ కొరియాలాగే చైనా కూడా ఇరాన్ నుంచి ఆయిల్ దిగుమతి చేసుకునేందుకు అనుమతిస్తారని ఆశిస్తున్నట్లు చెప్పారు. అయితే ఈ ఊరట తాత్కాలికంగా మాత్రమే ఉండొచ్చని కొందరు నిపుణులు చెబుతున్నారు.

అమెరికా విధించిన ఈ ఆంక్షల కారణంగా ఇరాన్ ముడి చమురు ఎగుమతులు భారీగా తగ్గుతాయని అంచనా వేస్తున్నారు. ఈ ఏడాది మధ్యలో రోజుకు 25 లక్షల బ్యారెళ్ల ముడి చమురును ఎగుమతి చేస్తున్న ఇరాన్.. ఏడాది చివరినాటికి 15 లక్షల బ్యారెళ్లను మాత్రమే చేసే అవకాశం ఉంది.