తిరుపతి:నేటి యువతలో ఆలోచన కంటే ఆవేశం ఎక్కువగా కనిపిస్తుంది. వ్యసనాలకు బానిసలుగా మారి అర్ధాంతరంగా జీవితాన్ని ముగించుకుంటున్నారు. ఆవేశపూరిత నిర్ణయాలతో  భవిష్యత్ శూన్యం చేసుకుంటున్నారు. తాజాగా తిరుపతికి చెందిన శివకుమార్‌ అనే యువకుడు ఆదివారం అర్ధరాత్రి తాగిన మైకంలో ఆత్మహత్య చేసుకున్నాడు. స్నేహితుడికి వీడియో కాల్‌ చేసి ఆత్మహత్య చేసుకుంటున్నానని చేప్పి లైవ్‌లోనే దారుణానికి పాల్పడ్డాడు. చనిపోతున్నా… చూడు అంటూ ఫ్యాన్‌కు ఉరేసుకుని మంచంపై నిలబడ్డాడు. స్నేహితుడు దాన్ని తమాషా అనుకున్నాడు. కానీ మంచంపై నుంచి కాలు కిందకు వేలాడడం చూసి హుటాహుటిన అతని దగ్గరకు పరిగెత్తాడు. అప్పటికే ఆ యువకుడు ప్రాణాలు విడిచాడు. శివకుమార్‌ తిరుపతిలో మెకానిక్‌గా పని చేస్తున్నాడు. ఈ ఘటనపై కేసు నమోదు చేసుకున్న పోలీసులు ఆత్మహత్యకు గల కారణాలపై దర్యాప్తు చేస్తున్నారు.