యూఏఈ: కొత్త అకడమిక్‌ ఇయర్‌ తొలి రోజు రోడ్డు ప్రమాదంలో టీచర్‌ గాయపడిన ఘటన అల్‌ అయిన్‌లో చోటు చేసుకుంది. అల్‌ సరూజ్‌ ప్రాంతంలో ఈ ఘటన చోటు చేసుకుంది. ఆదివారం సాయంత్రం జరిగిన ఈ ఘటనలో టీచర్‌కి తీవ్రంగా గాయాలయ్యాయి. పార్కింగ్‌ లాట్‌లోని తన కారు వద్దకు వెళుతుండగా ఈ ప్రమాదం చోటు చేసుకుంది. జీబ్రా క్రాసింగ్‌ వద్దనే ఆమె రోడ్డు దాటగా, ఓ కారు అతి వేగంగా దూసుకొచ్చి ఆమెను ఢీకొంది. పోలీసులు, ఈ ఘటనలో కారు డ్రైవర్‌దే తప్పుగా తేల్చారు. ఘటన గురించిన సమాచారం అందుకోగానే, అంబులెన్స్‌ సకాలంలో అక్కడికి చేరుకుంది. బాధితురాల్ని ఆసుపత్రికి తరలించారు. ఆమె శరీరంపై పలు చోట్ల గాయాలయ్యాయని వైద్యులు పేర్కొన్నారు. కాగా, రోడ్డు ప్రమాదానికి కారణమైన డ్రైవర్‌పై జరీమానా విధిస్తామనీ, చట్టపరమైన చర్యలు తీసుకుంటామని అధికారులు వివరించారు.