షార్జాలోని కల్బాలో ఓ స్కూల్‌ బస్‌ అగ్ని ప్రమాదానికి గురయ్యింది. అయితే డ్రైవర్‌ అత్యంత సాహసోపేతంగా వ్యవహరించి, తెలివైన నిర్ణయం తీసుకోవడంతో విద్యార్థులెవరికీ ఎలాంటి ప్రమాదమూ తలెత్తలేదు. మినిస్ట్రీ ఆఫ్‌ ఎడ్యుకేషన్‌ మీడియా సెంటర్‌ ఈ ఘటన గురించి స్పందిస్తూ, ప్రమాదం జరిగిన సమయంలో తక్కువమంది విద్యార్థులు మాత్రమే వున్నారనీ, డ్రైవర్‌ చాలా సమయస్ఫూర్తితో వ్యవహరించాడని తెలిపింది. సంఘటన గురించిన సమాచారం అందుకోగానే షార్జా పోలీస్‌ కంట్రోల్‌ రూమ్‌, ఫైర్‌ ఫైటర్స్‌నీ అలాగే అంబులెన్స్‌లనీ, పారా మెడిక్స్‌నీ సంఘటనా స్థలానికి పంపించడం జరిగింది. అగ్ని ప్రమాదాన్ని గుర్తించగానే బస్‌ డ్రైవర్‌, బస్సుని పక్కనే ఆపి వెంటనే అందులోంచి విద్యార్థుల్ని కిందకి దించేశాడనీ, ఆ తర్తా బస్సులో అగ్ని కీలలు మరింతగా పెరిగిపోయాయని ప్రత్యక్ష సాక్షులు వెల్లడించారు. బస్సు ప్రమాదానికి కారణాల్ని అన్వేషిస్తున్నారు పోలీసులు.