సౌదీ అరేబియా:కరోనా వైరస్ వ్యాప్తని అరికట్టేందుకు ప్రతీ అంశంలోనూ సౌదీ అరేబియా ప్రభుత్వం కట్టుదిట్టమైన చర్యలు తీసుకుంటోంది. ఇక వలస కార్మికులకు కేటాయించిన గదుల్లో ఎక్కువ మంది ఉండటాన్ని కూడా ప్రభుత్వం పరిగణలోకి తీసుకుంది. దీంతో కార్మికులు ఉండే గదుల్లో సామాజిక దూరం అమలయ్యేలా చర్యలు చేపడుతోంది. వివిధ గవర్నరేట్ వారి నివాస సదుపాయలను కల్పిస్తున్నారు. ఇందులో భాగంగా జెడ్డా మేయరాల్టి తమ పరిధిలో కార్మికుల నివాస సముదాయాల కోసం దాదాపు 531 ప్రదేశాలతో జాబితా సిద్ధం చేసింది. 23 ప్రభుత్వ స్కూళ్లలో 1,962 మందికి వసతి సౌకర్యం కల్పించింది. అలాగే మేయర్ కార్యాలయ అధికారులు కార్మికుల నివాస ప్రాంతాల్లో క్షేత్ర స్థాయిలో పరిశీలించి వైరస్ వ్యాప్తి చెందకుండా తగిన చర్యలు తీసుకుంటున్నారు. ఇప్పటికే దాదాపు 220 ప్రాంతాల్లో పర్యటించి దాదాపు 55 వేల మంది కార్మికులను చెకప్ చేశారు. వారు ఉండే గదులు, నివాస ప్రాంతాల్లో క్రిమి సంహారక చర్యలు చేపట్టినట్లు మేయర్ కార్యాలయ అధికార ప్రతినిధి వెల్లడించారు.