ఒమన్‌లో ట్యాక్సీలకు మీటర్ల వినియోగంపై దుమారం చెలరేగింది. ప్రభుత్వ నిర్ణయాన్ని ఆరెంజ్‌ ట్యాక్సీ డ్రైవర్స్‌ వ్యతిరేకించారు. మినిస్ట్రీ ఆఫ్‌ ట్రాన్స్‌పోర్ట్‌ అండ్‌ కమ్యూనికేషన్స్‌తో జరిగిన సమావేశంలో ట్యాక్సీ ప్రతినిథులు ప్రభుత్వ నిర్ణయం ఆమోదయోగ్యం కాదని తెలిపారు. ట్యాక్సీలకు మీటర్లను బిగించడం ద్వారా వినియోగదారులకు ఛార్జీల మోత మోగిపోతుందనీ, అది తమ జీవనంపై తీవ్ర ప్రభావం చూపుతుందని 500 ఆరెంజ్‌ ట్యాక్సీ డ్రైవర్స్‌ తరఫున అధికార ప్రతినిథిగా వచ్చిన సులేమాన్‌ అల్‌ జర్దానీ చెప్పారు. అయితే ట్యాక్సీల్లో ప్రయాణించేవారు, ట్యాక్సీ డ్రైవర్లు అదనంగా సొమ్ములు వసూలు చేస్తున్నారనే ఫిర్యాదులు చేయడంతో ఈ మీటర్‌ ప్రతిపాదన చేయాల్సి వచ్చిందని రాయల్‌ ఒమన్‌ పోలీసులు అలాగే మంత్రివర్గ అధికారులు వెల్లడించారు. అయితే ఛార్జీల పెంపుపై ప్రభుత్వానికి ప్రతిపాదనలు ఇచ్చినా, వాటిని ప్రభుత్వం పట్టించుకోవడంలేదనీ, వద్దంటున్న మీటర్‌ విధానాన్ని తమకు ఇష్టం లేకపోయినా ఎలా అమలు చేయాలని అనుకుంటున్నారని ట్యాక్సీ డ్రైవర్లు ప్రశ్నిస్తున్నారు.