దుబాయ్‌ని 2020 నాటికి డిజేబిలిటీ ఫ్రెండ్లీ సిటీగా మార్చే క్రమంలో వినూత్న ఆలోచనలతో ఔత్సాహికులు ముందుకొస్తున్నారు. డిజి రోబోటిక్స్‌ తాజాగా డ్రైవర్‌ రహిత కారుని 'ది సెల్ఫీకార్‌' పేరుతో రూపొందించింది. ఈ ప్రొటో టైప్‌ కారు డిజేబులిటీతో బాధపడ్తున్నవారికోసం ప్రత్యేకంగా రూపొందించారు. ఎలక్ట్రిక్‌ కారుని, డ్రైవర్‌లెస్‌ కార్‌గా రూపొందించామనీ, వీల్‌ఛెయిర్‌కే పరిమితమయ్యేవారికి ఈ కారు ఎంతో ఉపయుక్తంగా ఉంటుందని డిజి రోబోటిక్స్‌ కంపెనీ బిజినెస్‌ డెవలప్‌మెంట్‌ మేనేజర్‌ గౌతమ్‌ ఆహుజా చెప్పారు. యాక్సెస్‌ ఎబిలిటీ వర్క్‌షాప్‌నూ డిజి రోబోటిక్స్‌ కంపెనీ పాల్గొంది. ఎక్స్‌పోలో 30 దేశాల నుండి సుమారు 150 మంది ఎగ్జిబిటర్స్‌ పాల్గొంటున్నారు. సెల్ఫీ కార్‌ విషయానికి వస్తే ఓ బటన్‌ని ప్రెస్‌ చేస్తే కారులోని సీటు ఎటు కావాలంటే అటు తిరుగుతుంది. టచ్‌ బటన్‌ లేదా వాయిస్‌ కమాండ్‌తో కారు నిర్దేశిత ప్రదేశానికి వెళ్ళేలా సాంకేతికతను అభివృద్ధి చేశారు. 2016 లోనే ఈ కారుని మార్కెట్‌లోకి తీసుకు వస్తామనీ 125,000 డాలర్ల నుంచి 130,000 డాలర్లదాకా ఈ కారు ఖరీదు ఉండవచ్చని ఆహుజా చెప్పారు.