పశ్చిమ గోదావరి జిల్లా మొగల్తూరు మండల పరిధిలోని పేరుపాలెం సౌత్‌లో రూ.5కోట్ల నిధులతో చేపట్టనున్న అభివృద్ధి పనులకు రాజ్యసభ సభ్యుడు చిరంజీవి సోమవారం భూమిపూజ చేశారు. సంసద్‌ ఆదర్శ్‌ గ్రామ యోజన పథకంలో భాగంగా చిరంజీవి మొగల్తూరు మండలంలోని పేరుపాలెం సౌత్‌ గ్రామాన్ని దత్తత తీసుకున్నారు. సర్పంచి సోమిశెట్టి రంగనాథ్‌ అధ్యక్షతన నిర్వహించిన సభలో చిరంజీవి మాట్లాడుతూ.. పేరుపాలెం సౌత్‌ గ్రామం అభివృద్ధికి దూరంగా ఉండడంతో దత్తత తీసుకున్నానని చెప్పారు. భవిష్యత్‌లో మరికొన్ని గ్రామాలను దత్తత తీసుకుంటానని తెలిపారు. గ్రామంలో నూతన జూనియర్‌ కళాశాల, పీహెచ్‌సీ నిర్మాణానికి నిధులు మంజూరు చేస్తానన్నారు.