జెనీవా: ఆఫ్ఘన్‌ మహిళల,బాలికలపై తాలిబన్‌లు విధిస్తున్న కఠిన ఆంక్షలు తనను కలవరపెడుతున్నాయని ఐరాస ప్రధాన కార్యదర్శి అంటోనియో గుటెరస్‌ పేర్కొన్నారు.వారి పై పలు ఆంక్షలు విధిస్తున్నట్లు వెలువడిన నివేదికలు భయం కలిగించేవిధంగా ఉన్నాయని అన్నారు. తాలిబన్‌లు కాబూల్‌కు దగ్గరగా చేరుకున్నారని,ఆఫ్ఘనిస్తాన్‌పై పూర్తి నియంత్రణ సాధించారని దీంతో 2001లో ఐరాస చొరవతో కూలిపోయిన క్రూరమైన పాలన తిరిగి వస్తుందన్న భయాలను రేకేత్తిస్తోంది. ముఖ్యంగా మహిళలు, జర్నలిస్టులే లక్ష్యంగా తాలిబన్‌లు తమ నియంత్రణలో ఉన్న ప్రాంతాల్లో మానవ హక్కులపై తీవ్రమైన ఆంక్షలు విధిస్తున్నారనే నివేదికలు తనను కలవర పెడుతున్నాయని అన్నారు. ఆఫ్ఘన్‌ బాలికలు, మహిళలు కష్టపడి సాధించుకున్న హక్కులను తిరిగి కోల్పోతుండటం హృదయ విదారకంగా, బాధాకరంగా ఉందని అన్నారు. స్థానిక పౌరులపై దాడులు చేపట్టడం అంతర్జాతీయ మానవతా చట్టాన్ని తీవ్రంగా ఉల్లంఘించడం, యుద్ధ నేరంతో సమానమని హెచ్చరించారు.