ఇరాక్, సిరియాల్లో ఐఎస్‌ఐఎస్ క్రమంగా పట్టుకోల్పోతోందని తాజా అధ్యయనం వెల్లడించింది. గత పదిహేను నెలల్లో కరడుగట్టిన తీవ్రవాద సంస్థ తన అధీనంలో ఉన్న ప్రాంతాల్లో 22శాతంపై పట్టు కోల్పోయిందని తేలింది. ముఖ్యంగా గడచిన 3 నెలల్లో 8శాతం ప్రాంతం వారి చేజారిపోయిందని స్పష్టం చేసింది. ఆర్థికంగా, మందీమార్బలంలోనూ తీవ్రనష్టాలను ఎదుర్కొంటోందని వెల్లడించింది. ఐహెచ్‌ఎస్ జాన్‌సే360 అనే సంస్థ జరిపిన అధ్యయనంలో ఈ విషయాలు వెల్లడయ్యాయి. అతిక్రూరంగా ప్రత్యర్థులను మట్టుబెట్టి, ఆ దృశ్యాలను ప్రపంచానికి చాటిచెప్పే ఐఎస్‌ఐఎస్‌పై ప్రపంచదేశాలనుంచి దాడులు పెరగడంవల్ల ఈ పరిణామాలు సంభవించాయని ఆ నివేదిక పేర్కొంది.