కువైట్: ప్రపంచ వ్యాప్తంగా వేగంగా విస్తరిస్తోన్న కరోనా కొత్త వేరియంట్ ఒమిక్రాన్ పై పోరుకు కువైట్ ప్రభుత్వం సిద్ధమవుతోంది. తాజా పరిణామాలను గమనిస్తున్నామని, ఒమిక్రాన్ తో పోరాడటానికి సిద్ధంగా ఉన్నామని ప్రభుత్వ కమ్యూనికేషన్ సెంటర్ ఛైర్మన్, ప్రభుత్వ ప్రతినిధి తారెక్ అల్-మెజ్రేమ్ ఆదివారం తెలిపారు. ఉప ప్రధాన మంత్రి, రక్షణ మంత్రి షేక్ హమద్ జాబర్ అల్-అలీ అల్-సబా అధ్యక్షతన బయాన్ ప్యాలెస్‌లో కోవిడ్-19 పై చర్చించేందుకు  మంత్రుల కమిటీ సమావేశమైంది. సమావేశం తర్వాత అల్-మెజ్రెమ్ మాట్లాడుతూ.. అర్హులైన వారు బూస్టర్ డోస్ పొందాలని, కరోనా నియంత్రణ మార్గదర్శకాలను అనుసరించాలని కోరారు. మాస్కులు ధరించాలని, భౌతిక దూరం వంటి కరోనా నిబంధనలు పాటించాలని సూచించారు.