`పుష్ప` సినిమా థియేటర్లలో విజయవంతంగా రన్‌ అవుతుంది. భారీగా వసూళ్లని రాబట్టింది. ఈ నేపథ్యంలో మేకర్స్ అనూహ్యమైన నిర్ణయంతీసుకున్నారు. ఈ చిత్రాన్ని ఓటీటీలో విడుదల చేస్తున్నారు. 

ఐకాన్‌ స్టార్‌ అల్లు అర్జున్‌ నటించిన `పుష్ప` చిత్రం ఊహించిన విధంగా సక్సెస్‌ సాధించింది. మొదట మిశ్రమ స్పందన వచ్చినా ఆ తర్వాత మాత్రం దుమ్మురేపుతుంది. కలెక్షన్ల పరంగా రికార్డులు సృష్టిస్తుంది. ఇది `నాన్‌బాహుబలి` రికార్డులను కొల్లగొట్టింది. అల్లు అర్జున్ `అల వైకుంఠపురములో` తో క్రియేట్‌ చేసిన రికార్డులను తనే అధిగమించడం విశేషం. ఈ సినిమా ప్రపంచ వ్యాప్తంగా ఏకంగా మూడు వందల కోట్లు వసూలు చేసిందని ట్రేడ్‌ వర్గాల టాక్. 

ఇంకా పుష్ప సినిమా థియేటర్లలో విజయవంతంగా రన్‌ అవుతుంది. భారీగా వసూళ్లని రాబట్టింది. ఈ నేపథ్యంలో మేకర్స్ అనూహ్యమైన నిర్ణయంతీసుకున్నారు. ఈ చిత్రాన్ని ఓటీటీలో విడుదల చేస్తున్నారు. సినిమా ఓటీటీ రైట్స్ ని  అమెజాన్‌ ప్రైమ్‌ దక్కించుకున్న విషయం తెలిసిందే. అయితే పెద్దగా గ్యాప్‌ లేకుండానే సినిమాని విడుదల చేస్తున్నారు. ఈ నెల 7(శుక్రవారం) సినిమాని ఓటీటీ లో ప్రసారం చేస్తున్నారు. సినిమా డిసెంబర్‌ 17న విడుదల చేయగా, కేవలం ఇరవై రోజుల్లోనే ఓటీటీలో విడుదల చేయడం విశేషంగా చెప్పొచ్చు. థియేటర్లో మిస్‌ అయిన వారంతా ఇప్పుడు ఓటీటీలో చూసుకునే అవకాశం దక్కింది. 

అంతేకాదు ప్రస్తుతం `పుష్ప` హవా నడుస్తుంది. దాని గురించి చర్చ ఇంకా మార్కెట్‌లో ఉన్న నేపథ్యంలో ఇప్పుడు ఓటీటీలో రాబోతుండటంతో వ్యూస్‌ భారీగా వచ్చే అవకాశం ఉంది. ఆ పరంగానూ సినిమాకి కలిసొచ్చే అంశంగా చెప్పొచ్చు. దేశంలో కరోనా కేసులు భారీగా పెరుగుతున్నాయి. తెలుగు రాష్ట్రాల్లో కూడా ఒక్కరోజులోనే వెయ్యికిపైగా కేసులు నమోదయ్యాయి. కరోనా థర్డ్ వేవ్‌ దూసుకొస్తున్న నేపథ్యంలో థియేటర్లకి వెళ్లే ఆడియెన్స్ తగ్గిపోతారు. దీంతో ఇది ఓటీటీలో వచ్చే `పుష్ప` చిత్రానికి కలిసొచ్చే అంశంగా చెప్పొచ్చు.  

అమెజాన్‌ ప్రైమ్‌ ఈ విషయాన్ని ప్రకటిస్తూ `అతను(పుష్ప) పోరాడతాడు. అతను పరిగెత్తాడు. అతను దూకుతాడు. కానీ అతను లొంగిపోడు` అనే పవర్‌ఫుల్‌ మెసేజ్ ని పంచుకుంది. ఈ సందర్భంగా జనవరి 7న తెలుగు, తమిళం, కన్నడ, మలయాళంలో `పుష్ప` స్ట్రీమింగ్‌ కానుందని తెలిపింది. ఇంతవరకు బాగానే ఉంది. కానీ ఇక్కడే అసలైన ట్విస్ట్ ఉంది. 

`పుష్ప` ఓటీటీ రిలీజ్‌కి సంబంధించి బన్నీ ప్లాన్‌ అదిరిపోయిందని చెప్పొచ్చు. ఎందుకంటే ఈ చిత్రాన్ని కేవలం తెలుగు, తమిళం, కన్నడ, మలయాళంలోనే విడుదల చేస్తున్నారు. హిందీలో ఇది ఓటీటీలో స్ట్రీమింగ్‌ కావడం లేదు. అక్కడ ప్రస్తుతం `పుష్ప` థియేటర్లో బాగా ఆడుతుంది. వంద కోట్ల లక్ష్యంగా దూసుకుపోతుంది. హిందీ మార్కెట్‌లో రికార్డ్ స్థాయిలో దాదాపు ఎనభై కోట్లు కలెక్ట్ చేసిందని సమాచారం. తక్కువ ప్రమోషన్‌, `స్పైడర్‌ మ్యాన్‌` వంటి భారీ చిత్రం హవా సాగుతున్నా, బాలీవుడ్‌ చిత్రాలున్నా `పుష్ప` హిందీలో ఆ స్థాయిలో కలెక్షన్లని రాబట్టడం హిందీ ట్రేడ్‌ వర్గాలను ఆశ్చర్యానికి గురి చేస్తుంది. కరణ్‌ జోహార్‌, తరణ్‌ ఆదర్శ్‌ లాంటి వారే ఆశ్చర్యం వక్తం చేస్తుండటం విశేషం. 

దీంతో హిందీలో `పుష్ప` హవా కొనసాగుతున్న నేపథ్యంలో అక్కడ ఇప్పుడే ఓటీటీలో విడుదల చేసేందుకు ఒప్పుకోలేదు బన్నీ టీమ్‌. ఆ కండీషన్‌ తోనే `పుష్ప`ని ఓటీటీలో విడుదల చేస్తున్నారు. తెలుగు రాష్ట్రాల్లో కరోనా కేసులతో థియేటర్‌కి వెళ్లే ఆడియెన్స్ తగ్గిపోయారు, పైగా `శ్యామ్‌సింగరాయ్‌` బాగానే ఆడుతుంది. ఏపీలో టికెట్ల రేట్ల కారణంగా కలెక్షన్లు పెద్దగా రావడం లేదు. అందుకే హిందీ మినహాయింపుతో సౌత్‌లో `పుష్ప`ని ఓటీటీలో రిలీజ్‌ చేస్తున్నారు. ఎంతైనా బన్నీ ప్లాన్‌ అదిరిపోయిందనే చెప్పాలి. సుకుమార్ దర్శకత్వంలో రూపొందిన `పుష్ప`లో రష్మిక మందన్నా కథానాయికగా నటించిన విషయం తెలిసిందే.