బాహుబలి చిత్రం తర్వాత రానా క్రేజ్‌ ఏ స్థాయిలో పెరిగిందో ప్రత్యేకంగా చెప్పనక్కర్లేదు. తొలిసారి నౌకాదళ యుద్ధం నేపధ్యంలో ఘాజీ అనే చిత్రం తెరకెక్కుతుండగా, ఈ చిత్రంలో రానా కీలక పాత్ర పోషిస్తున్నాడు. సంకల్స్ రెడ్డి ఈ చిత్రానికి దర్శకత్వం వహిస్తున్నారు. ఢిల్లీ డాల్ తాప్సీ రానా సరసన జతకట్టింది. ఇండో -పాక్‌ యుద్ధ నేపధ్యంలో తెరకెక్కుతున్న ఈ చిత్రంలో కొంత మంది పాకిస్థాన్ రంగస్థల నటులను కూడా తీసుకున్నారట. అంతేకాదు వాళ్ళకి సంబంధించిన చిత్రీకరణ కూడా పూర్తి చేసినట్టు తెలుస్తుంది.ఘాజీ సినిమాలో నటించడం తనకెంతో ఆనందంగా ఉందని రానా తెలిపారు. 'అండర్ వాటర్'కి సంబంధించిన సన్నివేశాల చిత్రీకరణ కోసం, కొన్నిరోజుల పాటు ఉదయం నుంచి రాత్రివరకూ నీళ్లలో గడపవలసి వచ్చిందని అన్నారు రానా. ఘాజీ చిత్రంకు భారీ స్థాయిలో గ్రాఫిక్స్ వాడడం జరిగిందని, ఇందులోని స్పెషల్ ఎఫెక్ట్స్ ప్రేక్షకులను ఆశ్చర్య చకితులను చేస్తాయని తెలిపారు. పీవీపీ బ్యానర్ పై తెలుగు, హిందీ భాషల్లో తెరకెక్కుతున్న ఈ సినిమాను, దసరా కానుకగా విడుదల చేసే ఆలోచనలో ఉంది చిత్ర యూనిట్. రానా మరో వైపు బాహుబలి ది కంక్లూజన్ అనే చిత్రంలో నటిస్తున్న సంగతి తెలిసిందే.