హైదరాబాద్: తెలంగాణలో భారీ వర్షాలు కురిసే అవకాశం ఉందని భారత వాతావరణ శాఖ స్పష్టం చేసింది. రాబోయే రెండు రోజుల పాటు రాష్ట్రంలోని పలు జిల్లాల్లో వానలు దంచికొట్టనున్నాయని వాతావరణ అధికారులు వెల్లడించారు. ఇప్పటికే వాతావరణం మేఘావృతమై ఉండటంతో పలు ప్రాంతాల్లో వర్షాలు మొదలయ్యాయి. ప్రజలు అప్రమత్తంగా ఉండాలని అధికారులు హెచ్చరికలు జారీ చేశారు.

వర్ష సూచన ఉన్న జిల్లాలు ఇవే
రాష్ట్రంలోని వివిధ జిల్లాల్లో భారీ వర్షాలు పడే అవకాశం ఉంది. ముఖ్యంగా ఆదిలాబాద్, నిర్మల్, నిజామాబాద్, జగిత్యాల, రాజన్న సిరిసిల్ల, నల్గొండ, సూర్యాపేట, మహబూబాబాద్, వరంగల్, హనుమకొండ జిల్లాల్లో వానలు కురవనున్నాయి. వీటితో పాటు మెదక్, కామారెడ్డి, మహబూబ్ నగర్, నాగర్ కర్నూల్, కొత్తగూడెం, ములుగు, భూపాలపల్లి జిల్లాల్లో కూడా భారీ వర్ష సూచన ఉంది. ఏపీలోని పలు ప్రాంతాల్లో కూడా వర్షాలు పడతాయని వాతావరణ శాఖ పేర్కొంది.

ప్రజలు తీసుకోవాల్సిన జాగ్రత్తలు
వర్షాల నేపథ్యంలో బయటకు వెళ్లేవారు తగిన జాగ్రత్తలు పాటించాలి. భారీ వానల సమయాన చెట్ల కింద లేదా విద్యుత్ స్తంభాల దగ్గర నిలబడకూడదు. పిడుగులు పడే అవకాశం ఉన్నందున రైతులు, కూలీలు అప్రమత్తంగా ఉండాలని అధికారులు సూచించారు. లోతట్టు ప్రాంతాల్లో నివసించేవారు అప్రమత్తంగా ఉండి, వాతావరణ అప్‌డేట్స్‌ను ఎప్పటికప్పుడు గమనిస్తూ ఉండాలి.