మెగా ప్రిన్స్ వరుణ్ తేజ్ మొదటి నుంచీ సెలెక్టివ్‌గా సినిమాలు చేస్తుంటాడు. కథల ఎంపికలో వినూత్నంగా ఆలోచిస్తుంటాడు. మధ్య మధ్యలో కొన్ని ఫెయిల్యూర్స్ చవి చూసినా, స్టడీగా కెరీర్ కొనసాగిస్తున్నాడు వరుణ్ తేజ్.
ఇటీవలే, ‘ఎఫ్ 3’ సినిమాతో ఓ కమర్షియల్ హిట్ సొంతం చేసుకున్నాడు వరుణ్ తేజ్. తన తదుపరి ప్రాజెక్ట్‌ గురించి తాజాగా సోషల్ మీడియాలో ప్రకటించాడు వరుణ్ తేజ్. ఇది కూడా వినూత్నంగానే.
సినిమా పేరు, డీటెయిల్స్ ఏం తెలీయవు కానీ, వరుణ్ తేజ్ 13 వ చిత్రంగా ఈ సినిమా రూపొందబోతోంది. అందుకు సంబంధించిన కథ, కథనాలపై ఓ చిన్న వీడియోని రిలీజ్ చేసి, ఆసక్తి కలిగించాడు వరుణ్ తేజ్.
‘ఆకాశాన్ని తాకేందుకు..’ అంటూ స్టార్ట్ అయిన ఈ వీడియోలో వరుణ్ తేజ్ సీరియస్‌గా ఓ బుక్ చదువుతూ కనిపించాడు. వీడియో చివరిలో కళ్లకు బ్లాక్ గాగుల్స్ పెట్టుకుని స్టైలిష్‌ లుక్స్‌లో ప్రామిసింగ్‌గా కనిపించాడు. వీడియోలో ఓ పేపర్ విమానాన్ని చూపిస్తూ, టేకాఫ్ అవుతున్న రియల్ విమానానికి కనెక్ట్ చేశారు. అంటే ఇది ఎయిర్ వేస్‌కి సంబంధించిన కథా నేపథ్యంలో వుంటుందా.? లేక బ్యాక్ గ్రౌండ్‌లో వినిపించిన ఆర్ ఆర్‌ని బట్టి యుద్ధం నేపథ్యంలో వుండబోతోందా.? అనేది తెలియాల్సి వుంది.
సెప్టెంబర్ 19 నుంచి ఈ సినిమా ప్రారంభం కానుంది.