చైనాలోని జియాంగ్షు ప్రావిన్స్‌ రసాయన కర్మాగారంలో నిన్న ఉదయం భారీ అగ్నిప్రమాదం సంభవించింది. పెద్ద ఎత్తున ఎగిసిపడిన మంటలను అదుపు చేసేందుకు 600 మంది అగ్నిమాపక సిబ్బంది తీవ్రంగా శ్రమించారు. షాంఘై, నాన్జింగ్‌, నాన్‌టాంగ్‌, షుజో, వుక్సి నుంచి అగ్నిమాపక దళాలు సహాయక చర్యల్లో పాల్గొన్నాయి. రసాయనాలు నిల్వ ఉంచే ట్యాంకు దెబ్బతినడంతో అందులోని రసాయనాలు పరిసర ప్రాంతమంతా వ్యాపించి, మంటలను అదుపు చేయడం కష్టతరంగా మారింది. ప్రమాదం కారణంగా ఆయిల్‌ పైప్‌లైన్‌ను నిలిపివేశారు. గిడ్డంగిలో 42 ట్యాంకులు ఉండగా.. వాటిలో రెండు దగ్ధమయ్యాయని, మరో ఐదు ట్యాంకులకు మంటలు అంటుకున్నాయని అగ్నిమాపక అధికారులు తెలిపారు. ఈ గిడ్డంగిలో 42 ట్యాంకులతో పాటు, 12 గాసోలిన్‌ ట్యాంకులు అత్యంత ప్రమాదకరమైన రసాయనాలు ఉన్నాయని వెల్లడి ంచారు. గతేడాది ఆగస్టులో టియాంజిన్‌ రసాయన కర్మాగారంలో సంభవించిన అగ్నిప్రమాదం కారణంగా 165 మంది ప్రాణాలు కోల్పోయిన విషయం తెలిసిందే.