మహేశ్‌బాబు కథానాయకుడిగా నటిస్తున్న చిత్రం 'బ్రహ్మోత్సవం'. ఈ చిత్రానికి సంబంధించిన తాజా పోస్టర్‌ను మహేశ్‌బాబు బుధవారం సోషల్‌మీడియా ద్వారా విడుదల చేశారు. ఇటీవలే ఈ చిత్రంలో కాజల్‌ ఫస్ట్‌లుక్‌ను విడుదల చేశారు. ఇప్పుడు విడుదల చేసిన పోస్టర్‌లో మహేశ్‌బాబు చక్కగా నవ్వుతూ ఉంటే.. కాజల్‌ సిగ్గుపడుతున్నట్లు ఉండి అందరి దృష్టిని ఆకట్టుకుంటోంది. ఈనెల 7న చిత్ర ఆడియో విడుదల జరగనున్న విషయం తెలిసిందే. మంగళవారం ఈ చిత్రంలోని వచ్చింది కదా అవకాశం.. అనే పాట లిరికల్‌ వీడియోను విడుదల చేశారు.
శ్రీకాంత్‌ అడ్డాల దర్శకత్వం వహిస్తున్న ఈ చిత్రానికి ప్రసాద్‌ వి. పొట్లూరి నిర్మాతగా వ్యవహరిస్తున్నారు. పీవీపీ బ్యానర్‌పై ఈ చిత్రం తెరకెక్కుతుంది. సమంత, కాజల్‌లు కథానాయికలుగా నటిస్తున్నారు. మిక్కీ జె. మేయర్‌ సంగీత బాణీలు సమకూర్చారు. త్వరలో ఈ చిత్రాన్ని ప్రేక్షకుల ముందుకు తీసుకురావడానికి చిత్ర బృందం సన్నాహాలు చేస్తోంది.