ప్రముఖ దర్శకుడు దాసరి నారాయణ రావు బుధవారం తన పుట్టినరోజు జరుపుకొంటున్నారు. ఆయన పుట్టినరోజు సందర్భంగా శ్రేయోభిలాషులు, విద్యార్థులు, అభిమానులు దాసరికి జన్మదిన శుభాకాంక్షలు తెలియజేశారు. దాసరి ఇంట్లో నిర్వహించిన వేడుకలకు పలువురు సినీప్రముఖులు హాజరయ్యారు. ఈ విషయాన్ని దాసరి నారాయణరావు సోషల్‌మీడియా ద్వారా తెలియజేస్తూ కొన్ని ఫొటోలను అభిమానులతో పంచుకున్నారు. తనపై ఇంతటి ప్రేమాభిమానులు చూపించినందుకు గాను అందరికీ కృతజ్ఞతలు తెలిపారు. ప్రత్యేకంగా మోహన్‌బాబు, బాలీవుడ్‌ నటుడు శత్రుఘ్నసిన్నాకి ధన్యవాదాలు తెలియజేశారు.
ఆయన పుట్టినరోజు సందర్భంగా దాసరి, మోహన్‌బాబు, శత్రుఘ్నసిన్హా చేతుల మీదుగా 'సినీ ఉదయం' వెబ్‌సైట్‌ను ప్రారంభించారు. ఇందులో సినిమా, రాజకీయంతో పాటు, క్రీడలకు సంబంధించిన వార్తలు ఉన్నాయి. ఈ వేడుకల్లో జగపతిబాబు, దర్శకుడు కోడి రామమ్మూర్తి, మోహన్‌బాబు కుమార్తె మంచు లక్ష్మీ ప్రసన్న, నరేష్‌, గిరిబాబు, ఆర్‌.నారాయణమూర్తి, దగ్గుబాటి సురేశ్‌, ఛోటా కె.నాయుడు, బాబుమోహన్‌తో పాటు పలువురు సినీ ప్రముఖులు హాజరయ్యారు.