మస్కట్: మస్కట్ రోడ్లపై చిరుత పరుగులు పెట్టే వీడియో సోమవారం వైరల్ అయింది. ఈ వీడియోపై ప్రజలు ఆందోళన వ్యక్తం చేశారు. ముత్రా కార్నిచ్ రోడ్‌లో చిరుత పరుగెత్తుతున్నట్లు... రాయల్ ఒపెరా హౌస్ మస్కట్ ముందు చిరుత నడుస్తున్న వీడియో క్లిప్‌లో ఉంది.  పలువురు చిరుత సంచారంపై అధికారులకు కూడా సమాచారం అందించారు. అయితే, దీనిపై దర్యాప్తు ప్రారంభించిన అధికారులు అసలు విషయం తెలుసుకొని నవ్వుకున్నారు. అది ఒమన్ సుల్తానేట్‌లోని ఒక కంపెనీ ఎలక్ట్రానిక్ సేవను ప్రోత్సహించడానికి రూపొందించిన ప్రచార వీడియో అని తేల్చారు. ఈ ప్రాజెక్ట్ ను సినిమాటిక్ ఎఫెక్ట్‌లతో పూర్తి చేయడానికి దాదాపు నెలన్నర పట్టిందని, చిరుత పాత్రను చాలా సహజంగా చిత్రీకరించడంతో అందరూ ఆ వీడియో క్లిప్ ను అసలుదిగా భావించి కంగారు పడ్డారని అధికారులు చెప్పారు.