మస్కట్: నిజ్వాలో మంగళవారం మధ్యాహ్నం కురిసిన భారీ వర్షానికి పలు వాహనాలు కొట్టుకుపోయాయి. ఒమన్‌లో కుండపోత వర్షాలు కురిసి ఇళ్లను ముంచెత్తడంతో అత్యవసర సిబ్బంది చాలా మందిని రక్షించారు. సోమవారం రాత్రి, భారీ వర్షాలలో చిక్కుకుపోయిన 20 మంది పౌరులను పోలీసు హెలికాప్టర్‌లో పర్వత ప్రాంతం నుండి విలాయత్ ఆఫ్ డిమాకు తరలించారు.

ఉత్తర, దక్షిణ అల్ షర్కియా, అల్ వుస్తా, అల్ దఖిలియా, అల్ ధాహిరా మరియు సౌత్ అల్ బతినా గవర్నరేట్‌లలోని పలు ప్రాంతాల్లో మోస్తరు నుంచి భారీ వర్షాలు కురిశాయని, దీంతో అనేక వాడీలు పొంగిపొర్లాయని, నిజ్వా, సినావ్‌లో ట్రాఫిక్‌కు అంతరాయం ఏర్పడిందని అధికారులు తెలిపారు.  నిజ్వాలో, సుల్తాన్ ఖబూస్ అకాడమీ ఫర్ పోలీస్ సైన్సెస్ ముందు పార్క్ చేసిన చాలా కార్లు కొట్టుకుపోయాయి.

వ్యవసాయం, మత్స్య మరియు జలవనరుల మంత్రిత్వ శాఖ 22 ఏప్రిల్ 2023 నుండి ఏప్రిల్ 24 ఉదయం 9 గంటల వరకు అనేక ప్రాంతాల్లో వర్షపాతం నమోదైందని తెలిపింది. ఉత్తర అల్ షర్కియా గవర్నరేట్‌లోని వాడి బనీ ఖలీద్‌లోని విలాయత్‌లో అత్యధికంగా 74 మి.మీ. వర్షపాతం నమోదైంది. ఉత్తర అల్ షర్కియాలోని జలాన్ బనీ బు అ, దక్షిణ అల్ షర్కియాలోని అల్ ఖబిల్‌లో 73 మిమీ వర్షపాతం నమోదైంది. అల్ కమిల్ వాల్ వాఫీ విలాయత్ 68 మిమీ, ఇబ్రా 40 మిమీ, బిదియా 34 మిమీ, అమెరత్ 28 మి.మీ వర్షపాతం నమోదైంది.

 మరోవైపు ఒమన్ లోని పలు ప్రాంతాల్లో భారీ వర్షాలు కొనసాగుతాయని పౌర విమానయాన అథారిటీ (సీఏఏ) హెచ్చరికలు జారీ చేసింది. ప్రజలు లోయలను దాటవద్దని, పిల్లలపై నిఘా ఉంచాలని, లోతట్టు ప్రాంతాల నుండి దూరంగా వెళ్లాలని, ఈతకు ప్రయత్నించవద్దని ప్రజలను కోరింది.