గూగుల్‌ ప్రతిష్ఠాత్మకంగా చేపట్టిన ఉచిత వైఫై సర్వీసులను మరో ఐదు రైల్వే స్టేషన్లకు విస్తరించింది. ఉజ్జయిని, జైపూర్‌, పట్నా, గువాహటి, అలహాబాద్‌ రైల్వే స్టేషన్లలో వైఫై సేవలను ప్రారంభించినట్లు గూగుల్‌ ప్రకటించింది. త్వరలోనే ఈ సేవలను కేంద్ర రైల్వే మంత్రి సురేశ్‌ప్రభు లాంఛనప్రాయంగా ప్రారంభించనున్నట్లు పేర్కొంది. దీంతో దేశవ్యాప్తంగా మొత్తం 15 రైల్వే స్టేషన్లలో గూగుల్‌ ఉచిత వైఫై సదుపాయం అందుబాటులోకి వచ్చింది. ఈ ఏడాది చివరి నాటికి 100 రైల్వే స్టేషన్లలో ఈ సేవలను తీసుకొస్తామని గూగుల్‌ తెలిపింది.భారత రైల్వేకు చెందిన రైల్‌టెల్‌ నెట్‌వర్క్‌ భాగస్వామ్యంతో దేశంలోని 400 రైల్వేస్టేషన్లలో ఉచిత వైఫై సేవలను అందించేందుకు గూగుల్‌ ముందుకొచ్చిన విషయం తెలిసిందే. ఇందులో భాగంగా ఈ ఏడాది 100 రైల్వే స్టేషన్లలో వైఫై సేవలకు శ్రీకారం చుట్టింది. సెంట్రల్‌ ముంబయి, పుణె, భువనేశ్వర్‌, భోపాల్‌, రాంచీ, రాయ్‌పూర్‌, విజయవాడ, కాచీగూడ, ఎర్నాకులం జంక్షన్‌, విశాఖపట్నం ప్రాంతాల్లో ఇప్పటికే ఈ సేవలను ప్రారంభించింది. తాజాగా మరో ఐదు స్టేషన్లకు తమ సేవలను విస్తరించింది.ముంబయిలో ప్రారంభించిన ఈ సేవలకు మంచి ఆదరణ లభిస్తోందని.. త్వరలోనే ముంబయి శివారుల్లోని రైల్వేస్టేషన్లలోనూ ఈ సేవలను అందుబాటులోకి తీసుకొస్తామని గూగుల్‌ తెలిపింది.