దుబాయ్: కార్మికుల సంక్షేమం, వారి ఆరోగ్య భద్రత, సామాజిక బాధ్యతను ప్రోత్సహించే లక్ష్యంతో దుబాయ్ పోలీసులు నిర్వహిస్తున్న ‘షేడ్ అండ్ రివార్డ్’ (Shade and Reward) కార్యక్రమం వరుసగా ఐదో వారంలోనూ విజయవంతంగా కొనసాగింది. నద్ అల్ షెబా ప్రాంతంలో నిర్వహించిన ఈ కార్యక్రమంలో 800 మందికి పైగా కార్మికులు పాల్గొన్నారు.

దుబాయ్ పోలీసుల పాజిటివ్ స్పిరిట్ కౌన్సిల్ ఆధ్వర్యంలో నిర్వహించిన ఈ కార్యక్రమానికి నద్ అల్ షెబా పోలీస్ స్టేషన్, కమ్యూనిటీ సపోర్ట్ విభాగం, యాంటీ నార్కోటిక్స్, ట్రాఫిక్, హ్యూమన్ రైట్స్, ఆపరేషన్స్, లాజిస్టికల్ సపోర్ట్, దుబాయ్ పోలీస్ హెల్త్ సెంటర్ తదితర విభాగాలు సహకరించాయి.

ఈ సందర్భంగా కార్మికులకు భోజనం, గొడుగులు పంపిణీ చేశారు. తీవ్ర ఎండల్లో పనిచేసే కార్మికుల పట్ల దుబాయ్ పోలీసులు చూపుతున్న మానవతా దృక్పథానికి ఈ కార్యక్రమం నిదర్శనంగా నిలిచింది.

అలాగే వేసవి కాలంలో హీట్ స్ట్రెస్ (వడదెబ్బ) ప్రమాదాలపై కార్మికులకు ప్రత్యేక అవగాహన కల్పించారు. వడదెబ్బ నుంచి ఎలా రక్షించుకోవాలి, తగినంత నీరు తాగడం, విశ్రాంతి తీసుకోవడం, ఆరోగ్య జాగ్రత్తలు పాటించడం వంటి అంశాలపై నిపుణులు సూచనలు అందించారు.

యూఏఈ మానవ వనరులు మరియు ఎమిరాటైజేషన్ మంత్రిత్వ శాఖ అమలు చేస్తున్న మధ్యాహ్న విరామ నిబంధనల ప్రకారం జూన్ 15 నుంచి సెప్టెంబర్ 15 వరకు మధ్యాహ్నం 12:30 నుంచి 3:00 గంటల వరకు బహిరంగ ప్రదేశాల్లో నేరుగా ఎండలో పని చేయడం నిషేధం అనే విషయాన్ని కూడా కార్మికులకు వివరించారు.

దుబాయ్ పోలీస్ హెల్త్ సెంటర్ వైద్య సిబ్బంది కార్మికులకు ఆరోగ్య సలహాలు, అవగాహన కార్యక్రమాలు నిర్వహించి, ఎండాకాలంలో పాటించాల్సిన జాగ్రత్తలను వివరించారు.

ఈ కార్యక్రమంలో ‘థ్యాంక్ యూ ఫర్ యువర్ గివింగ్’ వాలంటీర్ బృందం గౌరవ సభ్యుడు డాక్టర్ ఖాలిద్ అల్ సలామీ పాల్గొని, కార్మికుల కోసం దుబాయ్ పోలీసులు చేపడుతున్న మానవతా కార్యక్రమాలను ప్రశంసించారు. ఇటువంటి కార్యక్రమాలు యూఏఈ సమాజంలో సేవాభావం, ఐక్యత, మానవతా విలువలను ప్రతిబింబిస్తాయని అన్నారు.

పాజిటివ్ స్పిరిట్ కౌన్సిల్ చైర్‌పర్సన్ ఫాతిమా అహ్మద్ బుహజీర్ మాట్లాడుతూ, ‘షేడ్ అండ్ రివార్డ్’ కార్యక్రమం వరుసగా ఐదో వారానికి చేరుకోవడం దాని విజయానికి నిదర్శనమని తెలిపారు. కార్మికులను వారి పని ప్రదేశాలకే వెళ్లి కలుసుకోవడం, వారికి నైతిక మద్దతు, ఆరోగ్య అవగాహన కల్పించడం ద్వారా దుబాయ్ పోలీసుల మానవతా సందేశాన్ని సమాజానికి చేరవేస్తున్నామని పేర్కొన్నారు.

కార్మికులు కూడా ఈ కార్యక్రమానికి హర్షం వ్యక్తం చేస్తూ, తమ సంక్షేమం కోసం ప్రభుత్వం, దుబాయ్ పోలీసులు చూపుతున్న శ్రద్ధకు కృతజ్ఞతలు తెలిపారు. ప్రతి కార్మికుడి గౌరవాన్ని కాపాడుతూ, సురక్షితమైన పని వాతావరణాన్ని కల్పించేందుకు యూఏఈ నాయకత్వం కట్టుబడి ఉందని ఈ కార్యక్రమం మరోసారి చాటిచెప్పిందని వారు అభిప్రాయపడ్డారు.