గూగుల్‌ ఓ రొమాంటిక్‌ రచయితను తయారు చేస్తోంది. అయితే.. అది మనిషి కాదు. కృత్రిమ మేధస్సు(ఆర్టిఫీషియల్‌ఇంటలిజెన్స్‌)తో పనిచేసే ఓ మెషీన్‌. కానీ.. అచ్చం జనాలు మాట్లాడుకునే భాషలో కథలు రాయగలదు! రొమాంటిక్‌ నవలలు అంతకంటే బాగా రాయగలదట. అందుకోసం గూగుల్‌ ఇప్పుడు ఆ 'కృత్రిమ రచయిత'తో కొన్ని వేల కథలను.. నవలలను చదివిస్తోంది.
2011లో ప్రారంభమైన 'గూగుల్‌ బ్రెయిన్‌' ప్రాజెక్టులో భాగంగా.. ఈ కృత్రిమ మేధస్సు(ఏఐ) మెషీన్‌ను అభివృద్ధి చేస్తున్నారు. మనుషుల మెదడు ఎలా పనిచేస్తుందో.. అలాగే పనిచేసేలా దాన్ని తీర్చిదిద్దుతున్నారు. అందుకోసం దాదాపు పదకొండు వేల ఈ-బుక్స్‌ను దానితో చదివించారట. వాటిల్లో 2,865 రొమాంటిక్‌ నవలలు.. కథలు కూడా ఉన్నాయి. మరో 15 వందల ఫాంటసీ నవలలు ఉన్నాయి. ఆ పుస్తకాలన్నింటిలో కలిపి రెండు వాక్యాలను ఇచ్చి కొత్త వ్యాక్యాలను రాయమంటే.. చకచకా రాసేసిందట. ఈ కృత్రిమ రచయిత పనితీరును ఇటీవల జరిగిన 'లర్నింగ్‌ రిప్రజెంటేషన్స్‌' అనే అంతర్జాతీయ సదస్సులో గూగుల్‌ పరిశోధకులు ప్రదర్శించారు.
''ఈ కృత్రిమ రచయిత అందుబాటులోకి వస్తే.. ఇక భవిష్యత్తులో రొమాంటిక్‌ నవలా రచయితలు ఉపాధికోసం ప్రత్యామ్నాయం చూసుకోవాల్సి రావొచ్చు'' అని నిపుణులు అభిప్రాయపడుతున్నారు.