దోహా: ఎక్స్‌పో 2023 దోహా హార్టికల్చరల్ ఈవెంట్‌లో భాగం కావడానికి ప్రత్యేకమైన అవకాశం స్వాగతం పలుకుతోంది. ఎక్స్ పో వాలంటీర్ ప్రోగ్రామ్‌లో చేరడానికి ఆసక్తిగా ఉన్న వ్యక్తుల కోసం అధికారికంగా దరఖాస్తులను ఆహ్వానించింది. #GreenTeamలో భాగంగా 2,200 మంది వాలంటీర్లను నియమించాలని నిర్ణయించారు. ఈ విషయాన్ని ఎక్స్‌పో 2023 దోహా తన వెబ్‌సైట్, సోషల్ మీడియా ఖాతాలలో ప్రకటించింది.

FIFA వరల్డ్ కప్ ఖతార్ 2022లో వాలంటీర్లు విజయవంతంగా పాల్గొనడంతో, వాలంటీరింగ్ అనేది ఇప్పటికే ఖతార్‌లో ప్రజాదరణ పొందింది. ఇప్పుడు, ఎక్స్‌పో 2023 దోహా విజయానికి వాలంటీర్ల మద్దతును కోరుతోంది. ఎక్స్‌పో 2023 దోహా వాలంటీర్లు కావాలనే ఆసక్తి ఉన్న వారు సెప్టెంబర్ 1 నాటికి కనీసం 18 సంవత్సరాలు నిండి ఉండాలి. ఆరు నెలల పాటు నెలకు ఏడు నుండి ఎనిమిది రోజులు సేవలు అందించాలి. దరఖాస్తుదారులు ప్రస్తుతం ఖతార్‌లో నివసించాలి. ఎక్స్‌పో 2023 దోహా అంతర్జాతీయ వాలంటీర్లకు వీసాలు, ప్రయాణ ఏర్పాట్లు లేదా వసతిని అందించదని స్పష్టం చేశారు. ఎక్స్‌పో 2023 దోహా కోసం స్వచ్ఛందంగా సేవ చేయడానికి, http://dohaexpo2023.gov.qa/en/take-part/volunteer-programme/ని సందర్శించాలి. అర్ధ-సంవత్సరం పాటు జరిగే ఈ ఈవెంట్ అక్టోబర్ 2 నుండి మార్చి 28, 2024 వరకు అల్ బిడ్డా పార్క్‌లో జరుగుతుంది. గత సంవత్సరం ప్రపంచ కప్ తర్వాత దేశం ఆతిథ్యం ఇవ్వనున్న రెండవ అతిపెద్ద ఈవెంట్‌కు మూడు మిలియన్ల మంది ప్రజలు హాజరవుతారని అధికారులు అంచనా వేస్తున్నారు.